Tato López, o cantautor detrás da Casa da Trova, un espazo de arte único en Galicia

Este xoves participaba nos micrófonos de Radio Líder Santiago o cantautor Tato López, resposable da Casa da Trova, unha escola de música situada en Santiago de Compostela e que destaca por ser un espazo único de formación en guitarra, voz e composición de cancións.  Este centro ofrece unha formación integral que inclúe técnica vocal, harmonía, guitarra, ukelele e diversas disciplinas relacionadas co mundo da canción. A filosofía principal da Casa da Trova é converterse nun lugar onde todos poidan aprender e ensinar, promovendo a música e a creatividade desde un punto de vista único.

Ademais da formación musical, Casa da Trova organiza encontros con trobadores de todo o mundo, onde os artistas poden compartir a súa experiencia e dar a coñecer o oficio da canción a través do seu traballo. O espazo tamén ofrece unha ampla oferta de cursos monográficos especializados en diferentes artes, como a guitarra, a voz e a pintura. A formación abarca diferentes estilos musicais, tanto clásicos como modernos, e inclúe a produción e desenvolvemento de proxectos musicais.

Hoxe, o Tato López, madrileño afincado en Santiago desde hai 22 anos é o responsable de crear o proxecto Casa da Trova. Durante a súa entrevista, López destacou as múltiples iniciativas complementarias que xorden a partir da escola, como A Noite da Trova que se celebra unha vez ao mes no Pub Atlántico da zona histórica de Compostela, onde se ofrece aos artistas noveis a oportunidade de participar nun concerto aberto ao público. Esta noite, e como excepción, a cita será no local da Casa da Trova en Basquiños 36, a partir das 21.00 horas, con entrada de balde.

No ámbito musical, Tato López conta con catro discos editados e está a traballar na gravación do seu quinto álbum. «Creo no oficio de facer cancións», subliñou López durante a entrevista, destacando a súa paixón pola música e a súa dedicación ao ensino e á creación musical na Casa da Trova. Durante a conversa con Álvaro Veiga interpretou en directo ‘Rebelión’, un dos temas do seu repertorio.

A entrevista completa no seguinte enlace.