Traxedia en Santiago: unha muller falece tras ser atropelada polo tren turístico

Imaxe: Salseo USC

Unha muller de 84 anos e veciña da capital galega perdeu a vida na mañá deste venres en Santiago despois de ser atropelada polo tren turístico na rúa Virxe da Cerca. O accidente produciuse arredor das 12.00 horas, a escasos metros da entrada á Praza de Abastos.

Segundo as primeiras investigacións, a vítima cruzaba a calzada fóra do paso de peóns no momento do impacto. Os servizos de emerxencias nada puideron facer por salvarlle a vida.

A Policía Local mantivo acordonada a zona ata a chegada do xuíz de garda para proceder ao levantamento do cadáver. Durante ese tempo, a rúa permaneceu pechada ao tráfico entre a Praza de Galicia e Porta do Camiño.

No tren viaxaban 39 persoas, que resultaron ilesas, segundo informou o Concello. O vehículo xa foi retirado da rúa e xa se restableceu a circulación.

Ata o lugar desprazouse un amplo operativo con efectivos sanitarios, bombeiros e axentes da Policía Local, así como o concelleiro de Seguridade Cidadá, Xan Duro. Tamén acudiu José Ramón Mosquera, xerente da empresa municipal de transporte (Tussa).

O suceso causou unha grande expectación nunha das zonas máis concorridas da cidade.