A sala de estudo do Milladoiro abre este luns con acceso as 24 horas do día

Desde hoxe, luns 14 de abril, xa está operativa a nova sala de estudo do Milladoiro, que ofrece un servizo de acceso ininterrompido durante todo o ano. Trátase dunha das principais novidades impulsadas polo departamento de Bibliotecas do Concello de Ames, que permite ás persoas usuarias acceder ao espazo de estudo en calquera momento do día ou da noite mediante un sistema de códigos QR personalizados.

O novo sistema está dispoñible tamén para a sala de estudo de Bertamiráns, aínda que neste caso o acceso segue limitado ao horario da Casa da Cultura. En ambos espazos instalouse un lector de códigos QR que permite a entrada e saída de forma autónoma.

Para facer uso destas salas, é preciso solicitar un código QR cubrindo este formulario e enviándoo ao correo electrónico biblioteca@concellodeames.gal. Tamén se pode tramitar de forma presencial nas bibliotecas municipais. A idade mínima para acceder ás salas é de 14 anos, e no caso de menores de idade, deberanse incluír os datos dunha persoa representante legal.

Horarios e acceso

Sala de estudo do Milladoiro: acceso 24 horas, 365 días ao ano. A entrada realízase pola rúa de Abaixo mediante código QR. Durante a noite, a porta de acceso á biblioteca permanecerá pechada, pero durante o horario diúrno estará aberta.

Sala de estudo de Bertamiráns: segue os horarios da Casa da Cultura. No inverno, abre de luns a venres de 8:00 a 22:00 h e os sábados de 9:00 a 14:00 h. En verán, o horario redúcese de luns a venres, de 8:00 a 14:00 h. Os domingos permanece pechada.

O Concello de Ames continúa traballando para que, no futuro, tamén en Bertamiráns se poida contar cun servizo 24/365. Mentres tanto, amplíase o horario desta sala para facilitar o acceso ao maior número de persoas posible.