“Detrás das festas de Calo hai un ano enteiro de traballo e a colaboración de todo o pobo”

• Borja Otero, presidente da Comisión de Festas de Calo, repasou en Radio Líder Santiago os principais atractivos dun programa que se desenvolverá os días 21, 23, 24, 25 e 26 de xuño e que volverá combinar tradición, gastronomía popular, música e algunhas das orquestras máis destacadas do panorama galego

As festas de San Xoán de Calo volverán converter a parroquia teense nun dos grandes puntos de encontro festivos da comarca cun programa que reunirá durante cinco xornadas gastronomía, tradición, actos relixiosos, música e grandes verbenas. Detrás deste cartel atópase o traballo da Comisión de Festas, encabezada por Borja Otero, quen destacou o esforzo colectivo que fai posible cada edición.

“Detrás das festas de Calo hai un ano enteiro de traballo e a colaboración de todo o pobo”, afirmou o presidente da comisión, que tamén puxo en valor a implicación da veciñanza, das empresas colaboradoras, do Concello de Teo e das persoas que continúan colaborando coa organización ano tras ano.

A programación arrancará o domingo 21 de xuño coa segunda edición da Festa do Colesterol, unha iniciativa que o pasado ano rexistrou unha gran acollida. “Arrancamos coa segunda Festa do Colesterol, que tanto éxito tivo o ano pasado”, destacou Otero. A proposta incluirá racións de patacas fritas, ovos fritos e chourizo fritido por oito euros, acompañadas dunha gran sesión vermú con tardeo e a animación da disco móbil Son de Festa e DJ Sonic. Ademais, os asistentes poderán seguir en directo o partido da selección española, previsto para as 18:00 horas, xa que a organización proxectará o encontro nas pantallas da disco móbil. “Nada mellor que nesa sobremesa despois da Festa do Colesterol que ver o partido de España”, sinalou.

Tradición, gastronomía e grandes orquestras

Tras unha xornada de descanso, as festas retomarán a súa actividade o martes 23 de xuño coa tradicional sardiñada popular e coa Queima da Cabra Vella, un dos actos máis representativos das celebracións de San Xoán en Calo.

Segundo explicou Borja Otero, a Queima da Cabra Vella é unha das tradicións máis emblemáticas das festas de San Xoán en Calo. A figura que arderá na fogueira é elaborada cada ano por un veciño da parroquia que leva preto de tres décadas colaborando coa celebración. Otero aproveitou tamén para agradecer a implicación de persoas que formaron parte doutras comisións e que continúan botando unha man na organización. “As anteriores comisións seguen colaborando igual con nós”, destacou. A noite completarase coa actuación do grupo Bomba e DJ Marcos Magán, dous nomes xa habituais nestas celebracións.

O mércores 24 de xuño, coincidindo coa festividade de San Xoán e co festivo autonómico en Galicia, desenvolveranse os tradicionais actos relixiosos, actuacións da Banda de Música da Sociedade Recreativa de Calo e unha sesión vermú co Dúo Ibiza. Pola noite chegará unha das primeiras grandes citas do cartel coa presenza de Mega Impacto, DJ Nyan Boe e a orquestra Marbella. “Pensamos que pode ser un día con moitísima xente”, asegurou Otero.

A programación continuará o xoves 25 con novas actuacións das agrupacións culturais da parroquia, sesión vermú co Dúo Matices e unha verbena protagonizada por Atenas e Panorama City, dúas das formacións máis destacadas do panorama galego.

O peche chegará o venres 26 con actos na honra de San Antonio, actuacións de música tradicional, o Dúo Reflexos e unha gran verbena final coa disco móbil Mega CDC, os DJs Martín Díez e Marcos Magán e a orquestra Olympus.

Un ano enteiro de traballo

Durante a entrevista, Borja Otero explicou que a organización das festas é un traballo que se desenvolve ao longo de todo o ano. “Xa acaba unha festa e xa estás pensando na seguinte”. A comisión está integrada por arredor de seis persoas, aínda que conta coa colaboración de numerosos veciños e veciñas. “Sen eles é un traballo que non sacaríamos adiante”, asegurou. O presidente tamén destacou a participación de máis dun cento de empresas no libro das festas, unha ferramenta fundamental para garantir a financiación dun cartel destas características.

“Todo é a base de traballo, traballo, traballo”, resumiu Otero ao explicar como se conseguen reunir os recursos necesarios para organizar unhas festas que cada ano atraen milleiros de persoas.

O presidente da comisión tamén quixo agradecer o apoio do Concello de Teo, que colabora facilitando medios e contribuíndo ao dispositivo de seguridade necesario para un evento destas dimensións. “Con esta afluencia de xente é importante ter un amplo dispositivo de seguridade”, sinalou. De feito, lembrou que na pasada edición chegaron a congregarse preto de 5.000 persoas na xornada de maior asistencia e mostrouse optimista ante a edición deste ano, favorecida ademais pola coincidencia co festivo autonómico. “Co tempo que vén, penso que vai ser moi bo. Van ser unhas noites espectaculares”, concluíu.

Con cinco días de celebración, tradicións tan arraigadas como a Queima da Cabra Vella, propostas gastronómicas populares e un cartel que inclúe formacións como Olympus, Panorama City, Marbella, Atenas, Mega Impacto ou Bomba, ademais de destacados DJs e discos móbiles, Calo prepárase para vivir unha nova edición dunhas festas que cada ano reúnen a milleiros de persoas e que son posibles grazas ao traballo colectivo de toda unha parroquia.