Santiago lembra as normas de limpeza e advirte de multas de ata 3.000 euros

Ao longo de 2025, o Concello de Santiago actuou para eliminar máis de 2.000 pintadas nos muros da cidade, retirou uns 16.500 depósitos de elementos voluminosos nas proximidades dos colectores de lixo, máis do 60% dos cales non foran avisados, como é preceptivo, e limpou 83 vertedoiros incontrolados en zonas periurbanas ou rurais. Tamén medraron os puntos en que aparece pegada cartelería en muros, fachadas, escaparates etc., e se detectan máis residuos depositados no colector incorrecto, abandonados no chan e en horarios inadecuados. Por outra parte, tamén se incrementaron os partes de denuncia da Policía Local por incumprimentos das normas de limpeza, protección do medio e uso da vía pública.

«Cómpre, pois», indica o texto, «solicitar de toda a cidadanía a colaboración necesaria para manter as condicións adecuadas de limpeza e ornato e esixir o cumprimento das normas básicas que recollen as ordenanzas municipais e a normativa sobre protección do medio, que prevén tamén sancións para os casos de incumprimento».

Con estes fins, a rexedora lembra as as seguintes disposicións:

• Non está permitido fixar carteis ou outros elementos publicitarios en lugares que non estean especialmente habilitados para este fin ou sen a debida autorización administrativa previa.
• Non está permitido realizar pintadas en calquera superficie a non ser que teñan carácter artístico e estean especificamente autorizadas.
• Os residuos deben depositarse nos colectores habilitados, segundo a súa natureza, e nos horarios que especifican as normas e que están anotados neses mesmos elementos.
• Calquera depósito de residuos voluminosos que non corresponda depositar nos contedores de lixo terá que facerse despois de concertar a hora e o día cos servizos de recollida, no teléfono 981 56 54 69, ou entregándoos nos puntos limpos.
• Está totalmente prohibido abandonar restos de obras ou similares en calquera lugar do territorio municipal.
• Na páxina santiagosostible.gal atópase toda a información sobre a forma, horarios e lugares para depositar os diferentes tipos de residuos.

As infraccións contra estas normas poderán ser sancionadas con multas de ata 3.000 euros para os casos máis graves.

O bando remata indicando que o anterior se fai público para coñecemento xeral e para o seu cumprimento por parte da cidadanía.