Secho e a SD Compostela separan os seus camiños

Santiago de Compostela, 29 de xuño de 2026. A SD Compostela e José Manuel Martínez Paz, Secho, separan os seus camiños unha vez rematada a tempada 2025/26, na que o conxunto compostelán acadou o ansiado ascenso a Segunda Federación a través do play off de ascenso.

O técnico de Porto do Son pon fin á súa etapa á fronte do primeiro equipo despois dunha campaña marcada polo compromiso, o traballo e a capacidade para conducir ao cadro branquiazul cara ao obxectivo marcado desde o inicio da tempada.

Tras once meses de intenso esforzo, dedicación e superación de numerosos retos, o equipo conseguiu recuperar a categoría, culminando con éxito unha tempada que quedará para o recordo da afección compostelanista.

A SD Compostela quere expresar o seu máis sincero agradecemento a Secho pola súa profesionalidade, entrega e implicación durante este tempo, desexándolle a maior das sortes nos seus próximos desafíos, tanto no ámbito profesional como persoal.