A Deputación da Coruña reforza o apoio ao deporte con 8M€ en subvencións e 62 bolsas para deportistas

• O deputado provincial do Deporte repasou en Radio Líder Santiago a Gala do Deporte, a Carreira dos 10.000 Peregrinos, o apoio ao deporte de base e distintas reivindicacións sobre infraestruturas e servizos en Oroso.

Redacción, 20 de marzo de 2026.- O deputado provincial do Deporte da Deputación da Coruña, Antonio Leira, defendeu en Radio Líder Santiago a aposta da institución polo deporte de base, pola diversidade de disciplinas e por un modelo “máis inclusivo, máis variado e máis dinámico”. Durante a entrevista, avanzou a celebración da cuarta edición da Gala do Deporte da Deputación, que terá lugar hoxe venres no Teatro Colón da Coruña, e destacou tamén o crecemento da Carreira dos Mil Peregrinos, prevista para a próxima fin de semana en Santiago. “O deporte de base é o noso ADN”, resumiu Leira, que incidiu en que a política deportiva provincial non pode centrarse só no fútbol, aínda que recoñeceu que é a disciplina con maior visibilidade.

Leira presentou a Gala do Deporte como “unha festa tamén de punto de reunión” para o conxunto do ecosistema deportivo da provincia, non só para os premiados. O deputado puxo en valor o recoñecemento a deportistas, adestradores, utilleiros, empresas e familias, ás que definiu cunha frase moi significativa: “As familias somos os maiores patrocinadores que hai no mundo do deporte”. Segundo explicou, nas edicións anteriores pasaron por esta cita nomes destacados como Ana Peleteiro, Fernando Romay, Belén Toimil, Carlos Arévalo ou Moncho Fernández, o que demostra, ao seu xuízo, “que na provincia imos dándonos conta de que cada vez é máis rico e máis variado” o panorama deportivo.

Na conversa, o responsable provincial de Deportes subliñou que a Deputación leva anos combinando colaboración cos clubs de base con eventos e circuítos propios. Entre eles citou as carreiras populares en 38 concellos da provincia, o baloncesto 3×3 na rúa, o balonmán 5×5 na rúa, as regatas de bateis e o circuíto de piragüismo. Sobre os programas de promoción deportiva, destacou os datos de participación: máis de 1.500 rapaces no primeiro ano do 3×3 e máis de 8.000 no balonmán de rúa na súa terceira edición. “Intentamos que todas as modalidades teñan cabida”, afirmou, remarcando ademais que a Deputación mantén “contacto continuo coas federacións” para incorporar propostas novas.

Outro dos eixos da entrevista foi a Carreira dos 10.000 Peregrinos, unha proba que, segundo Leira, “vai a máis” e que este ano xa superaba os 3.500 inscritos no momento da entrevista. O deputado explicou que a cita inclúe varias modalidades —10K, 5K, 2K inclusiva e carreira escolar— co obxectivo de abrir a participación a perfís moi diferentes, desde atletas de renome ata familias, nenos e persoas afeccionadas. “O obxectivo prioritario é que a xente participe, se divirta”, sinalou, afastando o foco dunha mera competición numérica, aínda que recoñeceu que chegar algún día aos 10.000 participantes “sería un soño”. Para Leira, a clave está en facer da proba “un día de festa” e en converter as rúas compostelás nun espazo de convivencia arredor do deporte.

No plano económico, Leira fixo fincapé no esforzo da Deputación para mellorar o apoio ao tecido deportivo. Indicou que existen “sete liñas de subvencións” e que o orzamento actual destinado a esta área ascende a “oito millóns de euros”, unha cifra relevante que, con todo, considera aínda insuficiente para atender todas as necesidades. “Sempre é insuficiente para chegarnos a todas as modalidades deportivas”, admitiu. O deputado explicou que a institución busca escoitar os clubs para adaptar as axudas ás súas necesidades reais e detallou tamén a evolución das bolsas a deportistas, que pasaron de 49 ao inicio da lexislatura a 62 na actualidade, cunha contía de 3.500 euros cada unha. Ademais, salientou a apertura destas bolsas a persoas con discapacidade e tamén a deportes non olímpicos, ampliando así o alcance da política pública deportiva.

Preguntado pola situación de distintos clubs galegos, Leira evitou identificarse cun único equipo e preferiu un discurso integrador: “Son de todos”. Aínda así, expresou o seu desexo de ver o Deportivo na Primeira División e de que tanto o Obradoiro como o Leyma Coruña poidan estar na ACB. “Que bonito sería que tiveramos tres equipos galegos”, comentou, deixando ver a súa especial afección polo baloncesto e a súa vontade de que Galicia gañe peso competitivo tamén nesa disciplina.

A entrevista abordou tamén a actualidade municipal e territorial, especialmente desde a súa condición de concelleiro en Oroso. Leira mostrouse moi crítico co estado das estradas nacionais e reclamou unha maior atención do Estado a este tipo de vías, que definiu como “as do pan noso de cada día”. En particular, referiuse á N-550 ao seu paso por Oroso, asegurando que se trata dunha estrada “en malas condicións” e lembrando as xestións realizadas ante a Delegación do Goberno. A este respecto, combinou prudencia e esixencia: “Temos que estar satisfeitos, pero atentos”, dixo, ao valorar o inicio dalgunhas actuacións sen renunciar a reclamar unha intervención máis ampla en toda a vía. Tamén se amosou favorable a reclamacións conxuntas con outros concellos afectados por deficiencias noutras estradas estatais.

No ámbito local, Leira puxo o foco na praza Isaac Díaz Pardo de Oroso. Aínda que recoñeceu a importancia de que se executase unha actuación nese espazo, cuestionou tanto a fórmula escollida como os problemas posteriores á súa apertura. Segundo sinalou, a praza abriu “sen estar rematada” e comezou axiña a presentar deficiencias, como pedras levantadas e outras incidencias. Máis alá diso, advertiu sobre un problema de seguridade ao entender que a separación entre a zona de lecer e a circulación rodada é insuficiente. “Eu quixera facer un chamamento para que fixeran tamén un plus no que é a seguridade da praza”, afirmou, propoñendo mellor sinalización, pasos de peóns e medidas que fagan o espazo máis accesible e seguro para menores e persoas maiores.

A Escola de Música de Oroso foi outro dos asuntos que o entrevistado situou entre as súas preocupacións prioritarias. Leira alertou da falta de renovación de matrículas, da carencia de material básico —como micros, altofalantes ou auriculares— e, sobre todo, da situación das instalacións. “O que máis nos preocupa é que chova dentro da Escola de Música”, advertiu, engadindo que a cuberta non foi arranxada e que esta situación pode xerar riscos incluso nos enchufes. Desde a súa perspectiva, trátase dun “déficit importantísimo” que require unha actuación urxente por parte do goberno municipal.

Xa na recta final da entrevista, e en clave política, Antonio Leira evitou concretar unha candidatura para 2027, aínda que deixou clara a súa disposición ao que decida o partido. “Estou a disposición do que diga o partido”, afirmou. Ao mesmo tempo, reivindicou o traballo da oposición socialista en Oroso tras dúas décadas de goberno, insistindo en que o papel actual pasa por facer “aportacións que sexan útiles” para a veciñanza. “Xa chegará o momento para despois decidir”, concluíu, deixando aberta a porta ao futuro pero sen precipitar escenarios.