A Mancomunidade Barbanza Arousa presenta o seu Plan de Promoción Turística para 2025

• A presentación incliu unha curtametraxe, un coloquio con representantes do sector e unha degustación de produtos locais para reforzar a identidade turística da comarca

O Pazo do Martelo, en Rianxo, acolleu este martes 13 de maio a presentación oficial do Plan de Promoción Turística da Mancomunidade Barbanza Arousa para o ano 2025. A entidade, conformada polos concellos de Rianxo, A Pobra do Caramiñal, Boiro e Ribeira, reuniu representantes institucionais e empresariais do sector para dar a coñecer as liñas mestras coas que busca impulsar o destino ao longo do vindeiro ano.

O acto comezaba ás 20.00 horas coa estrea da curtametraxe Sempre quereremos volver, unha peza audiovisual asinada polo director Lesmes Iglesias e financiada pola Xunta de Galicia, que pon en valor a esencia e os atractivos do territorio.

De seguido, celebrouse unha mesa redonda baixo o título A Promoción Turística do Destino, na que se abordaron cuestións clave para o desenvolvemento turístico da zona. O coloquio contou coa participación de figuras destacadas como Xosé Manuel Merelles, director da Axencia de Turismo de Galicia; Xosé Regueira, vicepresidente da Deputación da Coruña; Cesáreo Pardal, presidente do Clúster de Turismo de Galicia; e representantes do sector enogastronómico local como César Crusat, da adega Entre Os Ríos, e Alberto Carou, do restaurante O Curral do Marqués. A moderación correu a cargo de Fátima Cachafeiro, xerente da Mancomunidade.

Durante o debate, púxose o foco na importancia da colaboración entre administracións e empresas para potenciar a proxección do destino. Entre as ideas máis destacadas, subliñouse a necesidade de ofrecer experiencias auténticas e de calidade como ferramenta de atracción turística. “A autenticidade é un recurso turístico de primeira orde”, sinalou Merelles, mentres que Regueira destacou que “o turismo son os empresarios que xeran oportunidades e benestar”.

Cesáreo Pardal insistiu tamén na relevancia do traballo conxunto entre o público e o privado, sempre orientado cara á excelencia. Pola súa parte, os empresarios locais puxeron en valor a súa participación en iniciativas como o proxecto SICTED, impulsado pola propia mancomunidade, que permite mellorar a calidade dos servizos ofrecidos.

O evento contou coa presenza institucional de José Carlos Vidal, vicepresidente da mancomunidade e alcalde da Pobra, e José Ramón Romero, alcalde de Boiro, ademais de representantes municipais e técnicos dos catro concellos implicados.

A xornada pechouse coa intervención de Julián Bustelo, presidente da Mancomunidade e alcalde de Rianxo, quen agradeceu a implicación de todos os axentes participantes antes de dar paso a unha degustación de produtos locais e viños con selo da IXP Barbanza e Iria, completando así unha noite de posta en valor do territorio e de impulso ao turismo da comarca.