A renuncia en Conxo abre o debate sobre o futuro das comisións de festas afogadas pola burocracia

A recente dimisión en bloque da comisión de festas patronais de Conxo, composta por doce persoas, foi unha decisión madurada e irremediable. Así o confirmou Darío Lado, exintegrante da comisión, nunha entrevista concedida á Radio Líder de Santiago. Segundo Darío, a falta de colaboración administrativa e a carga burocrática extrema converteron o traballo voluntario nunha tarefa insostible.

«A pesares de organizar festas exitosas, non podíamos máis coas trabas administrativas. Cada evento implicaba enfrontarse a nova documentación e regulamentación, mesmo con normas europeas que cambiaban dunha festa para outra, o que nos desmotivaba profundamente», explicou Darío, visiblemente frustrado.

A situación alcanzou o seu punto crítico cando, a pesar da boa disposición da comisión, faltou unha ficha de documentación prometida polo Concello de Santiago que nunca chegou. «Non entendemos por que as normas para festas similares eran tan diferentes de un evento a outro. Perdémonos nun mar de burocracia», sinalou.

A concelleira de festas de Santiago, nunha entrevista previa na mesma emisora, subliñou que a burocracia é esencial para garantir a seguridade, pero recoñeceu a frustración da comisión. Tamén apuntou que a comisión de Conxo foi ambiciosa nos seus plans, o que incrementou a complexidade administrativa.

A solución que se baralla para evitar máis dimisións é a creación dunha federación de comisións de festas en Galicia, proposta que Darío considera positiva. «Necesitamos unha plataforma centralizada onde toda a documentación das orquestras, feirantes e outros colaboradores estea dispoñible dende o 1 de xaneiro, para que as comisións non teñan que empezar de cero en cada evento», engadiu.

Pese á dimisión, Darío confirmou que haberá un relevo na organización das festas de Conxo, probablemente coa creación de dúas novas comisións para San Serapio e A Mercé, que historicamente xestionaban os eventos por separado.

A entrevista de Darío rematou cunha nota de agradecemento a todas as persoas, empresas e veciños que colaboraron nas festas de Conxo nos últimos dous anos. «Foi un traballo duro, pero moi satisfactorio, a pesar de todo», concluíu.

Pilar Lueiro, edil de Festas de Santiago: «Todo son trabas, entendo perfectamente a frustración das comisións de festas»

Sobre este asunto falouse recentemente na emisora compostelá coa edil de Festas de Santiago, Pilar Lueiro, a cal lamentou a dimisión en bloque da comisión de festas de Conxo e explicou que «formei parte dunha comisión de festas, e entendo perfectamente cando falan de que todo son trabas».

Asegurou que a normativa de espectáculos esixe cumprir con requisitos estritos de seguridade, o que dificulta a organización dalgúns eventos. «Pedimos o que pide a lei, sobre todo por temas de seguridade. Se pasa algo nun inchable ou noutro aparato, logo veñen os problemas», sinalou.

A pesar destes inconvenientes, Lueiro amosou a súa admiración polo traballo realizado pola comisión de Conxo e outros organizadores, recoñecendo o seu esforzo desinteresado e a súa dedicación para manter vivas as tradicións festivas da cidade.

A entrevista completa no seguinte enlace.