Ames aproba a contratación do mantemento do alumeado público por preto de 620.000 euros

• A prestación do servizo comprende o mantemento preventivo e o control da iluminación, o mantemento correctivo e o mantemento técnico legal
• As empresas interesadas terán ata o 16 de marzo para presentar as súas ofertas

Ames, 10 de febreiro de 2026.- A Xunta de Goberno Local vén de aprobar o pasado xoves, 5 de febreiro, o expediente para a contratación do servizo de mantemento preventivo, correctivo e técnico legal do alumeado público do Concello de Ames. O orzamento base de licitación ascende a 619.076,88 euros (IVE incluído). As empresas interesadas terán ata o 16 de marzo para presentar as súas ofertas.

O Concello de Ames, a través da Concellaría de Obras e Servizos Básicos, aprobou esta licitación que ten como obxecto toda instalación de alumeado público e iluminación monumental baixo a titularidade municipal. Exemplos destes emprazamentos son prazas, rúas, vías urbanas, parques, aparcadoiros e outras áreas ao aire libre e de libre acceso.

O alcalde de Ames, Blas García, destaca que “durante os últimos anos o Concello de Ames apostou polo aforro enerxético co cambio a LED, primeiro das luminarias do Milladoiro, despois co cambio das luminarias de todo o rural, e por último coas luminarias de Bertamiráns. Tras ditas actuacións foron arredor de 6.000 as luminarias que se cambiaron por tecnoloxía LED en todo o concello”.

O concelleiro de Obras e Servizos Básicos, Gustavo Nieto, explica que “o desenvolvemento tecnolóxico das instalacións de alumeado exterior fai que o mantemento deste tipo de instalacións sexa cada vez mais especializado. A introdución de iluminación LED, en substitución das lámpadas de descarga, os medios de elevación e de seguridade no traballo, entre outros aspectos, propician a necesidade de contratar por parte da administración a empresas especializadas nas labores de conservación e mantemento do alumeado exterior”.

Prestación do servizo

En canto ao alumeado festivo, a empresa adxudicataria deberá promover o abastecemento a eventos culturais, ociosos ou deportivos desenvolvidos principalmente nos núcleos do Milladoiro e Bertamiráns, aínda que tamén de xeito esporádico nas demais parroquias de Ames. Este abastecemento será mediante a instalación de cadros eléctricos conectados á liña da distribuidora ou mediante grupos electróxenos subministrados pola empresa adxudicataria.

Do mesmo xeito, a prestación do servizo comprende o mantemento preventivo e o control da iluminación, o mantemento correctivo e o mantemento técnico legal. Ademais, tamén se contemplan outros servizos asociados, como o alumeado festivo, certificados, informes, presupostos, axudas e tramitacións.

Actualmente, en todo o termo municipal hai un total de 7.043 unidades de luminarias instaladas. Non obstante, para efectos contractuais, tómase como referencia o inventario realizado pola auditoría enerxética no 2019, que contempla un total de 7.200 luminarias. A empresa adxudicataria estará obrigada a manter os modelos, características e calidades dos equipos existentes, salvo en casos especificados polos servizos técnicos municipais.

A prestación do servizo ten os seguintes obxectivos:

-Asegurar a continuidade do servizo e o correcto funcionamento.

-Realizar as reparacións, substitucións ou reposicións necesarias; mantendo tanto o nivel técnico dos equipos e compoñentes, como os actuais parámetros de calidade de alumeado.

-Asegurar o funcionamento seguro das instalacións de alumeado público ante posibles danos a persoas ou cousas.

-Instalación de cadros eléctricos para eventos culturais, sociais ou de outro tipo; asi como festas parroquiais.

-Subministro de grupos electróxenos para eventos.

Todas aquelas empresas interesadas no concurso deberán presentar os seus proxectos
antes do 16 de marzo. A duración do contrato será de tres anos, podendo prorrogarse anualmente ata un máximo de catro anos.