Ana Pontón, convidada deste martes 28 de outubro en Los Desayunos del Gran Hotel Los Abetos

Radio Líder Galicia celebrará o vindeiro martes, 28 de outubro, unha nova edición de Los Desayunos del Gran Hotel Los Abetos, o espazo radiofónico e multimedia que reúne a destacadas personalidades da actualidade política, empresarial e social de Galicia. Nesta ocasión, a protagonista será Ana Pontón, portavoz nacional do Bloque Nacionalista Galego (BNG), quen analizará a situación política galega e estatal, así como os principais retos económicos e sociais do noso país.

O encontro, de 10:00 a 11:30 horas, emitirase en directo desde o emblemático hotel compostelán e poderá seguirse a través de toda a rede de emisoras de Radio Líder en Galicia, ademais de en streaming mediante as redes sociais da cadea.

O programa estará conducido por Álvaro Veiga, director de Radio Líder Santiago, quen moderará a conversa inicial coa líder nacionalista. Nesta ocasión, o diálogo enriquecerase coa participación de dous recoñecidos xornalistas galegos:

• Carmen Chao, reporteira de Antena 3 Noticias, con máis de dúas décadas de experiencia en medios audiovisuais. Desenvolveu boa parte da súa traxectoria en programas como Desde Galicia para el Mundo (TVE Internacional e TVG), Fun polo aire e Galicia Viva, así como unha longa etapa en Mediaset, e conta cunha ampla experiencia como presentadora, guionista e realizadora en diferentes produtoras galegas.

• Antonio Lodeiro, xornalista con unha dilatada carreira en medios e comunicación institucional. Foi xefe de prensa do Parlamento de Galicia e director de comunicación da Xunta, entre outros cargos. Actualmente conduce o programa Matinal Líder cada mañá en Radio Líder Galicia.

Los Desayunos del Gran Hotel Los Abetos consolídase como un foro de encontro e reflexión sobre a actualidade, ofrecendo cada mes unha conversa en profundidade con figuras destacadas da política, a empresa, a investigación ou a docencia en Galicia.

Este espazo está patrocinado por: Gran Hotel Los Abetos, M. Maroñas Correduría de Seguros, Ángel Mar Cetárea, Iconología Logística e Transportes e Grúas Estación.