Arzúa amosa o seu potencial turístico a National Geographic

Begoña Balado e Juan Chuet

Arzúa viviu unha fin de semana ateigada de visitantes con motivo da 50ª edición da súa emblemática Festa do Queixo. Entre os asistentes destacou a presenza do xornalista de Viajes National Geographic, Juan Chuet, quen puido coñecer de primeira man os principais atractivos naturais, patrimoniais, gastronómicos e culturais do municipio.

Aproveitando a súa visita, o Concello de Arzúa organizou un percorrido por algúns dos lugares máis emblemáticos da zona, como a Fonte Santa e Ribadiso, ademais de ofrecerlle unha inmersión na riqueza gastronómica local con paradas en establecementos como Queixería Barral, Galmesán, Hotel 1930, Casa Brandariz e Pazo de Santa María. Por suposto, a Festa do Queixo foi un dos grandes reclamos da fin de semana, permitindo a Chuet descubrir de preto a tradición e o sabor que fan deste evento unha cita imprescindible no calendario galego.

Dende o Concello de Arzúa agradeceron a visita do xornalista e avanzaron que haberá novas sorpresas proximamente para seguir promovendo o destino como referencia turística en Galicia.