Arzúa pon en valor o entorno do campo da feira do polbo

O Concello de Arzúa, a través da súa Concellería de Turismo, pon en marcha un proxecto de mellora paisaxística e promoción do Camiño Francés no entorno do Campo da Feira do Polbo, grazas ao convenio de colaboración coa Axencia de Turismo de Galicia e a Mancomunidade de Concellos Galegos do Camiño Francés, do cal a concelleira de Turismo, Comercio e Promoción Económica, Begoña Balado é a súa vicepresidenta.

O obxectivo deste proxecto é resolver as deficiencias actuais deste espazo emblemático, que combina a área arborada e unha zona formigonada utilizada para o aparcamento e para as tradicionais feiras , celebradas os días 8 e 22 de cada mes. As actuacións previstas inclúen a reposición e acondicionamento das zonas de arborado, a mellora dos alcorques e dos pavimentos de granito, ou o acondicionamento de toda a madeira ;  pero a novidade principal é  a renovación e conservación da marquesiña, que terá agora un sistema de protección lateral con vidros e vinilos alusivos ao Concello de Arzúa, reforzando o valor patrimonial e turístico do lugar.

Entre as melloras específicas destacan a reposición das varandas de aceiro que, anteriormente situadas na marquesiña, se colocarán na explanada cara á rúa Valle Inclán para aumentar a seguridade no desnivel. Tamén se renovarán as bandas de granito e a capa de biomasa nos alcorques para protexer o arborado, así como a reparación das áreas formigonadas e a colocación de bancos de granito.

Balado destaca que “esta intervención representa un compromiso co coidado do noso espazo público, buscando preservar e mellorar un lugar tan significativo como é o Campo da Feira do Polbo. Con estas obras, queremos non só mellorar as infraestruturas existentes, senón tamén fortalecer a experiencia dos visitantes e a comodidade da veciñanza, que cada mes acude a este espazo para participar nas nosas feiras tradicionais..”A concellería que eu dirixo segue a postar pola revitalización dos espazos de encontro, respectando o seu valor histórico e paisaxístico.”

As obras teran un prazo de execución de un mes. Esta actuación representa un paso importante na valorización deste espazo de Arzúa, integrando elementos culturais e paisaxísticos de interese para visitantes e veciñanza, consolidando o seu papel fundamental no desenvolvemento turístico do Camiño Francés.