A Baña busca que a Festa da Filloa da Pedra sexa de Interese Turístico de Galicia

O alcalde José Antonio Pereira Gil e a concelleira de Turismo Ana Pensado están a percorrer os establecementos comerciais da Baña para recoller apoios e sinaturas que avalen a candidatura da Festa da Filloa da Pedra como Festa de Interese Turístico de Galicia.

Coa entrega das carpetas de recollida de sinaturas, o goberno local busca o respaldo da cidadanía e do sector para lograr este recoñecemento institucional, que destacaría a importancia cultural e turística dunha celebración que xa leva máis de 20 anos poñendo en valor a tradición, a gastronomía e a identidade do concello.

«Queremos que a nosa filloa sexa historia de Galicia», destacaron os representantes municipais, animando a veciñanza e visitantes a sumarse á iniciativa.

A Festa da Filloa é unha das citas máis emblemáticas da comarca, combinando artesanía, música, folclore e o sabor único da filloa tradicional.