Compostela pecha a entrada dos VTC pero terá liña de bus nocturna e máis licenzas de taxi

 

 

 

Este martes, a alcaldesa de Compostela, Goretti Sanmartín, participou no programa de Vive Santiago de Radio Líder Santiago, onde abordou diversos temas da actualidade local e anunciou novas iniciativas para a cidade.

Entre os anuncios destacados, Sanmartín revelou que o Pazo de Raxoi está a traballar na licitación dun novo contrato de autobuses, o cal incluirá liñas nocturnas para mellorar a mobilidade urbana. Ademais, comprometeuse a ampliar as licenzas de taxi, rexeitando a entrada dos VTC, co obxectivo de garantir un servizo de transporte público de calidade.

Outro proxecto resaltado pola alcaldesa foi a necesaria construción dun aparcadoiro no ámbito do Complexo Hospitalario Universitario de Santiago (CHUS), unha necesidade urxente para a cidade. Sanmartín afirmou que o investimento debe ser compartido entre o concello e a Xunta, subliñando a importancia de coñecer o proxecto en profundidade antes de asignar fondos.

En resposta ás queixas veciñais sobre a falta de iluminación en distintas rúas do Casco Vello, a rexidora asegurou que o problema será solucionado de inmediato, comprometéndose a instalar novas luminarias LED en diferentes zonas da cidade para mellorar a seguridade e o conforto dos cidadáns.

Os recentemente aprobados orzamentos municipais, valorados en 142 millóns de euros, foron destacados por Sanmartín como «os mais altos da historia». A alcaldesa asegurou que estes fondos se destinarán a cumprir os compromisos tanto na cidade como nos barrios e no rural compostelán.

Outra medida anunciada nos micrófonos de Radio Líder Santiago foi a posta en marcha dunha taxa turística co obxectivo de facer de Santiago un destino turístico sostible. Sanmartín sinalou que esta iniciativa segue o exemplo doutras cidades e busca equilibrar o impacto do turismo no medio ambiente e na comunidade local.

Finalmente, en relación á campaña electoral do próximo 18 de febreiro, Sanmartín expresou o seu apoio a Ana Pontón como a primeira presidenta de Galicia. Tamén compartiu as súas peticións urxentes ao novo presidente ou presidenta da Xunta, destacando a necesidade de traballar en colaboración para o beneficio da cidade e da súa xente.

A entrevista completa no seguinte enlace: