Comunicado do goberno de Dodro ante as «falsas acusacións» de Unidade Veciñal de Dodro

• Antes as «falsas informacións», difundidas polo grupo político Unidade Veciñal de Dodro, o goberno municipal defende a limpeza en tódolos procesos de concesión de licenzas.

Dodro, 14/11/2025 – Ante as acusacións, por parte do grupo político Unidade Veciñal de Dodro, de favoritismo na concesión de licencias o concello de Dodro quere aclarar os seguintes puntos.

A empresa Matadero del Sar, S.L. ten solicitado nos últimos meses distintos permisos de obra con distintas finalidades. Todas as licencias seguiron as canles e os procedementos habituais e a empresa pagou os canons correspondentes. Algunha destas solicitudes está aínda sen resolver.

Matadero del Sar S.L. foi acredor dunha subvención de 1.100.000,00 da Xunta De Galicia, segundo consta no Diario Oficial de Galicia de data 14 de agosto de 2023. Esta mesma publicación recolle que a axuda concedida ten como finalidade “incentivar os investimentos para a transformación e comercialización de produtos agrarios”. Estes investimentos non teñen porque ser, como pretende dar a entender UVD, unha única obra e poden incluír a compra de maquinaria, mobiliario ou outro tipo de bens non suxeitos a canons municipais. E convinte ler adecuadamente as resolucións de axudas e entendelas.

A propia natureza da axuda obriga a unha transparencia absoluta, unha contabilidade específica que reflicta unicamente o uso dos fondos e a presentación de toda a documentación precisa. Si parte dos fondos son destinados a unha obra, a empresa terá que presentar a licenza correspondente ou a solicitude da mesma.

Dende o goberno de Dodro queremos destacar que o investimento total da empresa Matadero del Sar SL en Dodro pretende alcanzar os 3.728.407,83 € polo que é de destacar que a parte privada é moi superior á pública.

Emprazamos a Unidade Veciñal de Dodro a que non sega o camiño de outros grupos e se informe antes de publicar bulos que prexudican, máis que ao grupo político que goberna, ao concello e a imaxe de rigor que calquera institución pública debe ter.

Tódalas empresas, tódolos grupos políticos e tódolos procesos poden ser criticados desde a sociedade e desde os seus representantes no concello. Esa crítica ten que ser feita coa verdade por diante, o populismo na política non ten cabida.