Críticas do Grupo Municipal Socialista ao PSdeG local polo «teatrillo» na negociación dos Orzamentos

Comunicado do Grupo Municipal Socialista de Santiago de Compostela relativo á votación do proxecto de Orzamentos 2025:

«Cabe preguntarse en que mellorou a calidade de vida das nosas veciñas e veciños despois do “teatrillo” que realizaron estes días, a conta dos orzamentos, a dirección local do PSdeG de Aitor Bouza e Marta Santullano coa complicidade de Gumersindo Guinarte e Marta Abal.

Cabe preguntarse tamén en que mudaron uns orzamentos que xa estaban pechados desde hai un mes para que, o venres, estas persoas afirmaran que non podían asegurar a súa votación favorable, e que agora digan que van facilitar a súa aprobación.

A resposta ás dúas preguntas é: en nada.

En nada mellorou o noso concello con este “teatrillo”, que só responde ao afán de protagonismo dalgunhas persoas; e en nada mudou o proxecto de orzamentos que mañá se vai aprobar.

O único que houbo aquí foi unha escenificación para chamar a atención, e simular un exercicio de poder. E todo isto xogando con un tema tan transcendental para o noso concello como son os orzamentos do municipio.

Este é o nivel? De verdade? Para isto quedaron o señor Guinarte e a señora Abal?

Todo, absolutamente todo polo que preguntaron á señora Sanmartín nestes días, xa fora tratado nas reunións de negociación nas que participara a propia Marta Abal. En todas elas estivo, e sabe que se tratou desde a execución do anterior acordo ata as previsións e cronograma das actuacións que recolle este.

Só hai unha cousa que non se tratara antes, unha única cuestión. Un único asunto que foi a súa principal esixencia. Se queren, que o aclaren, e digan a toda a cidadanía cal foi a súa principal reclamación ao goberno local para aprobar as contas locais.

Entón a xente verá que isto, unha vez máis, non vai de mellorar a vida das nosas veciñas e veciños.

Isto vai doutra cousa.»