Día de Rosalía en Ames con todas estas actividades

O Concello de Ames súmase un ano máis á conmemoración do aniversario de Rosalía de Castro, unha das escritoras máis universais de Galicia e que, ademais, foi veciña da aldea da Tarroeira, na parroquia de Ortoño, durante unha parte da súa infancia.

A programación deste ano, como vén sendo habitual, busca a participación da veciñanza, ofertando unha ampla variedade de actividades para todas as idades, mais poñendo o foco na poboación máis nova. Deste xeito, a programación deste ano pretende estimular e dinamizar o uso do galego entre a mocidade amesá, poñendo en valor e achegándolles referentes en canto ao uso da nosa lingua.

Programación Día de Rosalía 2025
A programación deste ano está deseñada e coordinada entre os departamentos de Bibliotecas, Normalización Lingüística e Turismo. A primeira das actividades programadas para conmemorar o Día de Rosalía é “Rosalía Cantareira” de Jara Ortiz, un concerto didáctico que tamén forma parte do programa Apego e que achegará as crianzas á parte máis musical da poeta. A actividade desenvolverase este venres 14 de febreiro, ás 18.00 horas, no auditorio do Milladoiro.

A principal novidade do programa deste ano vén da man de Fernando Yáñez, coñecido por ilustrar os murais solidarios da fundación Art for Dent. Deste volta, o artista realizará unha intervención artística urbana ao aire libre, na que empregará como soporte as caixas de semáforos dalgunhas rúas de Bertamiráns e do Milladoiro. O principal obxectivo desta iniciativa é xerar impacto, proximidade e visibilidade entre toda toda a veciñanza e as persoas que se acheguen ou pasen polo Concello de Ames.

Concretamente, pintaranse catro caixas (tres localizadas en Bertamiráns e unha no Milladoiro) coa silueta de Rosalía e tamén cuns versos da autora. Este conxunto de murais complementa o mural solidario rosaliano da asociación Art for Dent, inaugurado no 2024 e situado na avenida da Maía en Bertamiráns.

Por outra banda, o venres 21 de febreiro, as crianzas dos comedores escolares municipais poderán volver a degustar un ano máis o caldo de gloria. Así pois, o alumnado dos comedores dos centros escolares de Ventín, Barouta, Agro do Muíño e Maía poderán degustar deste prato tradicional. O Caldo de Gloria aparece descrito no poema rosaliano “Miña casiña, meu lar”, en Follas Novas, no que unha muller pobre conta como consegue, fronte ás adversidades que a rodea, facer un caldo de gloria.

Tamén se desenvolverán os obradoiros “Crea e debuxa”, dirixidos a crianzas a partir de 3º de primaria e que se impartirán o venres 21 no Milladoiro e o sábado 22 en Bertamiráns. Nesta actividade, a rapazada poderá amosar o seu lado máis creativo mentres que coñecen diferentes obras da ilustre escritora. O prazo de inscrición para participar está aberto ata o vindeiro 18 de febreiro e pódese facer chamando ao 981 884 829 (biblioteca de Bertamiráns) ou 981 530 807 (biblioteca do Milladoiro) ou enviando un correo electrónico ao enderezo biblioteca@concellodeames.gal indicando o nome, apelidos e curso, o nome do adulto responsable e un número de teléfono de contacto.

O sábado 22 de febreiro volverá a realizarse a actividade xa habitual dentro da programación polo Día de Rosalía, “Viaxando con Rosalía”. Unha excursión literaria á Casa de Rosalía en Padrón, con paradas en Ortoño e Bastavales, que achegará as persoas asistentes á vida da escritora, sobre todo á súa especial relación co Concello de Ames. A viaxe estará guiada pola especialista rosaliana, María López Sández. Para participar, é preciso inscribirse enviando un correo a normalizacion@concellodeames.gal ou chamando ao número 662 377 215, entre o 14 e o 20 de febreiro.

Gala homenaxe a Rosalía de Castro
Como vén sendo habitual, desta vez o luns 24 de febreiro, a Casa da Cultura de Bertamiráns acollerá, a partir das 19.00 horas, unha homenaxe poética e musical a Rosalía de Castro. A gala volverá a estar presentada pola comunicadora e actriz Cristina Collazo e tamén contará coa actuación musical de Uxía Senlle e Santi Cribeiro. A entrada será libre ata completar a capacidade do auditorio.

No evento participará todo o alumnado dos centros educativos de Ames, xunto con outras persoas representantes de diferentes colectivos amesáns. Deste xeito, realizarase un acto no que se busca a participación da veciñanza para poñer en valor a figura de Rosalía a través de recitados, música, actuacións e proxeccións.

Rutas teatralizadas pola Costa do Mar de Ovellas
Esta edición volverá a desenvolverse, tras a súa boa acollida o ano pasado, a andaina teatralizada pola Costa do Mar de Ovellas, baseada no poema de Rosalía A probiña, que está xorda. Realizaranse un total de catro rutas, que contarán coa colaboración do grupo teatral Os Quinquilláns e da regueifeira Lupe Blanco.

Haberá tres funcións específicas para os institutos de Ames e realizarase unha para o público xeral. Os participantes farán un percorrido de dificultade media duns 5 quilómetros cun 10% de pendente.

A ruta destinada ao público xeral desenvolverase o domingo 9 de marzo e contará con servizo de traslado en autobús para as persoas asistentes, con saída desde O Milladoiro ás 10.00 horas e desde Bertamiráns ás 10.15 horas. Ademais de poder gozar da ruta, que comeza en Aguapesada e finaliza en Trasmonte, haberá ao final unha pequena festa con música e degustación de petiscos. A inscrición para participar estará aberta do 24 de febreiro ata o 6 de marzo, enviando un correo ao enderezo normalizacion@concellodeames.gal.

Por outro lado, as rutas programadas para os alumnos dos institutos de Ames desenvolveranse o martes 18 de febreiro e martes 11 de marzo para o IES do Milladoiro e o luns 17 de marzo para o IES de Bertamiráns.

Acto de presentación das actividades
Ao acto acudiron o alcalde de Ames, Blas García; a concelleira de Educación, Carmen Porto; a técnica de Normalización Lingüística, Rosa Moreiras, e a técnica de Turismo, Sonia Moure.

O alcalde de Ames e responsable dos departamentos de Normalización Lingüística, Turismo e Bibliotecas, Blas García, subliñou que “o Concello de Ames é un referente tamén no traballo e apoio de salientar a figura de Rosalía de Castro, xa que tamén está moi vencellada ao noso concello. Gústanos poñer en valor a súa figura e tamén amosar todo o que segue representando hoxe en día”.

Pola súa banda, a técnica de Normalización Lingüística, Rosa Moreiras, explicou que “queremos seguir achegándolle á veciñanza a figura e traxectoria de Rosalía, pois é unha figura coa que nos identificamos todas e todos os galegos e que segue moi vixente. É moi necesario seguir traballando con ela e transmitir esa imaxe de Rosalía empoderada, unha muller culta e feminista, comprometida con todas as causas xustas e, como non, coa lingua galega”.

Deste xeito, a concelleira de Educación, Carmen Porto, destacou que “esta programación tan ampla pretende achegar aos mozos amesáns a figura de Rosalía e amosarlles o seu legado e importancia dentro do noso concello”.