Eloy Juncal e David Prego debutarán no Rally da Coruña 2025

O piloto ordense Eloy Juncal Ríos e o seu copiloto David Prego Varela darán o salto ao mundo dos rallys coa súa primeira participación no 29º Rally da Coruña, que se celebrará os días 21 e 22 de marzo. O equipo afronta este novo desafío a bordo dun Citroën Saxo, co que competirán nas categorías Volante FGA e Promoción Xoven Piloto 2026.

A presentación oficial do vehículo tivo lugar o pasado sábado no recinto feiral do Mesón do Vento, nun acto no que estiveron arroupados por máis dun centenar de amizades e persoas afeccionadas. O proxecto conta ademais co respaldo de varios patrocinadores que fan posible a súa participación nesta competición.

Juncal e Prego afrontan este debut cun obxectivo claro: obter o mellor resultado posible, pero, sobre todo, aprender e gozar da experiencia. “Sempre que non haxa golpes, a idea é seguir competindo noutras probas como Ferrol ou Pontevedra”, comentaron.

O Rally da Coruña será así o punto de partida dunha nova etapa para este equipo galego, que buscará consolidarse no mundo do automobilismo.