Estes son os oito centros educativos galegos que participarán en Fala que Fala

Radio Líder, en colaboración coa Secretaría Xeral da Lingua, pon en marcha unha nova edición de “Fala que Fala”, o espazo que busca fomentar o uso do galego entre a mocidade a través da comunicación e a radio. Nesta ocasión, oito centros educativos de diferentes puntos de Galicia foron seleccionados entre o medio cento que se inscribiron na fase previa, para participar neste proxecto que combina formación, creatividade e difusión do idioma.

Os centros participantes son:

• CPR Plurilingüe San José de Cluny (Santiago, A Coruña)

• IES Francisco Daviña Rey (Monforte de Lemos, Lugo)

• IES Luis Seoane (Pontevedra)

• CPI Doctor López Suárez (Friol, Lugo)

• IES de Cacheiras (Teo, A Coruña)

• IES O Ribeiro (Ribadavia, Ourense)

• IES Castelao (Vigo, Pontevedra)

• CPI Virxe da Saleta (San Cristovo de Cea, Ourense)

Durante as próximas semanas, alumnado destes centros elaborará contidos radiofónicos en galego que serán emitidos en Radio Líder e difundidos a través das súas plataformas dixitais e das redes sociais. A iniciativa pretende dar voz aos máis novos, poñendo en valor o idioma galego como ferramenta de expresión e comunicación contemporánea.

Con este proxecto, Radio Líder e a Secretaría Xeral da Lingua reforzan o seu compromiso coa promoción da lingua galega entre a mocidade, apostando pola creatividade, o traballo en equipo e a comunicación como eixes fundamentais.