Falece un operario tras caerlle unha árbore enriba en Outes

Un operario perdeu a vida esta mañá nunha zona de monte en Vilardigo, na parroquia de Cando, no concello de Outes, tras caerlle unha árbore enriba mentres traballaba.

O aviso ao 112 Galicia produciuse ás 10:35 horas, cando un particular alertou do accidente. Segundo indicaba, o traballador quedara debaixo da árbore e podería estar xa falecido no momento da chamada.

De inmediato, activouse un amplo operativo no que participaron Urxencias Sanitarias de Galicia-061, Bombeiros de Boiro, GES de Noia, Garda Civil, Policía Local e Protección Civil da localidade.

Ao chegar ao lugar, os equipos de emerxencia confirmaron que o operario estaba liberado, pero, a pesar dos esforzos realizados, nada se puido facer por salvarlle a vida.