Falecido un home nun incendio na súa vivenda en Ames

GES BRIÓN

As forzas da orde investigan as circunstancias dun incendio mortal ocorrido esta mañá en Bertamiráns.

Pouco antes das 10:00 horas, un veciño alertou ao 112 Galicia ao detectar unha densa fumareda nas zonas comúns dun edificio situado na rúa Alcalde Lorenzo.

De inmediato, o Centro Integrado de Atención ás Emerxencias mobilizou os equipos de intervención, solicitando a asistencia de Urxencias Sanitarias de Galicia-061, do GES de Brión, da Garda Civil e da Policía Local de Ames. Tamén foron informados os Bombeiros de Boiro e Santiago, así como os voluntarios de Protección Civil, por se fose necesaria a súa colaboración.

Ao chegar ao lugar, os servizos de emerxencias accederon á vivenda onde se orixinou o lume e atoparon no seu interior un home de 87 anos inconsciente, tendido no chan. O incendio foi sufocado rapidamente cun extintor, quedando os danos limitados a materiais almacenados na entrada da vivenda.

Pouco despois, os servizos sanitarios confirmaron o falecemento do home, unha persoa de avanzada idade, sen que fose posible facer nada por salvarlle a vida. As autoridades continúan investigando as causas do suceso.