“Lalín xa non é o que era”: o PSdeG denuncia unha deriva na seguridade

O grupo municipal do PSdeG-PSOE en Lalín expresou a súa preocupación pola evolución da seguridade no municipio, advertindo dun crecente sentimento de intranquilidade entre a veciñanza. A súa secretaria xeral e voceira, Alba Forno, sinalou que a percepción cidadá mudou nos últimos tempos, afastándose da imaxe de calma que tradicionalmente caracterizaba á vila.

Desde a formación socialista consideran que o executivo liderado por Crespo non está a actuar con contundencia ante esta situación. Forno destacou a escaseza de efectivos da Policía Local, que actualmente conta con nove axentes, unha cifra que cualificou de insuficiente para atender as necesidades dun concello como Lalín. Ademais, lembrou que non existe cobertura nocturna e que, mesmo coa incorporación de tres novos policías en formación, o número total seguirá lonxe do que consideran axeitado, estimando que deberían superar a vintena.

Segundo a voceira socialista, nos últimos tempos aumentaron os comentarios sobre roubos, furtos e outros incidentes, algo que, asegura, non era habitual no día a día da localidade e que está a xerar inquietude entre os veciños.

Forno incidiu en que manter a seguridade require esforzo constante, con medidas baseadas na prevención, a presenza policial e unha planificación axeitada. Tamén puxo o foco na necesidade de impulsar políticas de convivencia e cohesión social que contribúan a reforzar o benestar colectivo.

O PSdeG quixo deixar claro que o seu obxectivo non é crear alarma, senón chamar á acción ante unha realidade que, ao seu xuízo, xa se está a facer evidente. “Cando a seguridade pasa a ser un tema recorrente nas conversas da xente, é porque algo está cambiando”, indicou Forno.

Finalmente, os socialistas recoñeceron o labor da Garda Civil na resolución dos feitos delictivos, pero insistiron en que a seguridade máis próxima é responsabilidade directa do Concello. Por iso, reclaman ao goberno local que asuma o seu papel e adopte medidas para recuperar a tranquilidade que, segundo defenden, sempre definiu a Lalín.