O Concello investirá 11 millóns de euros para desenvolver o plan Conecta Ames

O alcalde de Ames, Blas García, explicou “dito investimento vaise a repartir en proxectos para os núcleos urbanos de Bertamiráns e do Milladoiro, así como nos núcleos do rural. O que pretendemos é vertebrar o noso concello a través dunha senda que se vai a executar para unir Bertamiráns e O Milladoiro, e vertebrar o rural porque neste plan inclúese a implantación dun sistema de transporte público para unir o rural cos núcleos urbanos. Tamén se inclúe a creación dun novo mercado municipal e de novas zonas verdes, e un proxecto para achegar os servizos de atención á veciñanza ao rural porque se van a mellorar os locais sociais”

Sobre os proxectos dixo “o proxecto que temos máis avanzado é o do mercado municipal que será o primeiro que executaremos, porque xa temos o proxecto técnico feito, e apalabrado coa Xunta de Galicia e coa Deputación da Coruña a colaboración en materia de financiamento. Dos 4,3 millóns de euros que ten que achegar o Concello para chegar ao 11 millóns de euros que contempla este plan, xa teríamos a achega de 2 millóns de euros da Xunta de Galicia e 1 millón da Deputación da Coruña”

Ames, 3 de outubro de 2025.- O Concello de Ames vén de recibir a boa nova de que foi seleccionado dentro da convocatoria para a asignación de senda financeira do Fondo Europeo de Desenvolvemento Rexional aos plans EDIL, no marco do desenvolvemento urbano sostible, con cargo ao FEDER para o período 2021-2027. Deste xeito, a Ames correspóndenlle 6.547.727 euros, que representan o 60% sobre o importe total do Plan Conecta Ames. O 40% restante que ascende a 4.365.151 euros terá que ser achegado a través de financiamento propio, autonómico ou provincial. O investimento total que se vai executar será de 10.912.878 euros. O plan de Ames contempla a execución de catro grandes proxectos, que se enmarcan nunha estratexia xeral, e están recollidos na Axenda Urbana 2030.

O plan Conecta Ames recolle catro grandes proxectos, todos eles son proxectos transformadores, cun enfoque de converxencia entre a área de intervención e o resto do municipio. Ademais, son proxectos realistas, maduros e que se poden realizar no prazo previsto. Por último, son integradores, participados e divulgados. No caso do Concello de Ames todas estas premisas cúmprense ao ser proxectos xa incluídos na Axenda Urbana 2030 e que seguen unha estratexia xeral.

O alcalde de Ames, Blas García, explicou “que a través do plan Conecta Ames vanse investir 11 millóns de euros, un investimento moi importante que vai a servir para cambiar o noso concello e ter un concepto distinto do Ames que coñecemos agora mesmo. Nesta ocasión dito investimento vaise a repartir en proxectos para os núcleos urbanos de Bertamiráns e do Milladoiro, así como nos núcleos do rural. O que pretendemos é vertebrar o noso concello a través dunha senda que se vai a executar para unir Bertamiráns e O Milladoiro, e vertebrar o rural porque neste plan inclúese a implantación dun sistema de transporte público para unir o rural cos núcleos urbanos. Vai ser o investimento máis importante que se faga en Ames nos últimos 15 – 20 anos. Tamén se inclúe a creación dun novo mercado municipal e de novas zonas verdes, e un proxecto para achegar os servizos de atención á veciñanza ao rural porque se van a mellorar os locais sociais”.

O rexedor municipal tamén apuntou que “este non é un plan deste goberno, senón que é un plan de toda a Corporación municipal e de todos os veciños e veciñas de Ames, porque naceu da participación na elaboración da Axenda Urbana, un proceso no que se lle deu a correspondente participación aos grupos políticos e á cidadanía. Unha Axenda Urbana da que imos falar nun foro que se vai celebrar na Coruña o 22 de outubro porque nos convidou un Ministerio. Este é un xeito de que se valore o gran traballo feito na elaboración da nosa Axenda Urbana”.

Sobre os proxectos dixo “o proxecto que temos máis avanzado é o do mercado municipal que será o primeiro que executaremos, porque xa temos o proxecto técnico feito, e apalabrado coa Xunta de Galicia e coa Deputación da Coruña a colaboración en materia de financiamento. Dos 4,3 millóns de euros que ten que achegar o Concello para chegar ao 11 millóns de euros que contempla este plan, xa teríamos a achega de 2 millóns de euros da Xunta de Galicia e 1 millón da Deputación da Coruña”.

Proxectos enmarcados nunha estratexia xeral
Deste xeito, na EDIL do Concello de Ames inclúese un primeiro proxecto que se define como a construción dunha estratexia alimentaria integral Km0, apoiada nun novo mercado de abastos e un banco de terras de produción local que inclúe as seguintes accións: a construción do mercado municipal de abastos, en Bertamiráns, e a rexeneración do espazo exterior; a integración co entorno verde próximo a través da rúa do Cómaro; a creación dun banco de terras de catro hectáreas recuperadas para o cultivo ecolóxico na Condomiña (na contorna fluvial do río Sar); e mailo asesoramento e formación aos produtores.

O segundo proxecto aborda a vertebración do municipio a través da creación dunha senda ciclable que conecte O Milladoiro e o rural coas dotacións de referencia, integrando e poñendo en valor o patrimonio e os nodos sociais de referencia ubicados ao longo da mesma, que inclúe a conexión peonil e ciclista entre O Milladoiro e Bertamiráns (conexión Milladoiro – Biduído de Arriba – Bugallido – Ortoño – Bertamiráns); a recuperación de espazos públicos periurbanos como as rúas Ameixeiras e Juan Bueno Bueno, Bugallido, corredoira de Ortoño, Guimaráns, Buceleiras e Ortoño ata chegar á rúa Alcalde Lorenzo.

A través de dito proxecto tamén se contempla a humanización e reverdecemento do entorno das rúas Estivada de Castelao e Camelias, no Milladoiro, como lugar de arranque da senda; e a humanización e a ordenación da praza de Chavián, en Bertamiráns, como nodo de remate do eixo conector. Por último, preténdese a creación dun corredor verde en Bertamiráns, entre a praza de Chavián e o parque do Ameneiral, así como a recuperación da flora autóctona e dos sendeiros no parque do Ameneiral.

O terceiro proxecto atende á vertebración do municipio a través da implantación dun transporte público, que una de maneira áxil os núcleos de O Milladoiro e Bertamiráns, entre eles e co rural. Para iso preténdese a posta en marcha dunha liña circular de autobús eléctrico entre O Milladoiro e Bertamiráns; a actualización das marquesiñas de transporte público e a dixitalización das mesmas; así como a creación dun sistema de transporte baixo demanda, para facilitar a conexión dos distintos núcleos entre si e cos dous núcleos principais.

O cuarto e último proxecto recolle a creación e adaptación das dotacións para mellorar a oferta de servizos no rural e favorecer a centralidade dos núcleos. Trátase de facer unha reforma para a adaptación de usos ás necesidades da poboación nova e maior e da rehabilitación enerxética dos locais sociais das parroquias de Biduído, Ames, Piñeiro e Ortoño. Tamén se contempla a creación de puntos de atención municipal (equipamento dixital e dotación de 5G) e un programa de alfabetización dixital das comunidades; e a posta en marcha dun plan de dinamización dos núcleos, a través da programación de apoio social, loita contra a soidade e fornecemento cultural da man das asociacións municipais, nun marco de fomento da autoxestión.

O plan Conecta Ames conta cun orzamento total de gasto de 10.912.878 euros. De dito importe o Concello de Ames vai sufragar 6.547.727 euros (60%), a través de fondos europeos FEDER da Estratexia de Desenvolvemento Integrado Local (EDIL), mentres que o 40% restante, que ascende a 4.365.151 euros, terá que ser achegado a través de financiamento propio, autonómico ou provincial.