O Festival Sons de Reis pechará a visita dos Reis Magos ao Pino este luns, 5 de xaneiro

• Os DJs Daviz Expósito, Compota e ToniSalvaje, acompañados polo grupo Nueva Fuerza, encherán de música a carpa climatizada xunto a casa da cultura dende as 20.30 horas

• A segunda edición deste festival comezará tras a recepción oficial dos Reis Magos no polideportivo municipal de Reboredo

• As Súas Maxestades de Oriente percorrerán as parroquias do Pino, comezando en Pereira ás 10.45 horas e rematando en Cebreiro ás 18.30

O Pino. 2-1-2025.- Este luns, 5 de xaneiro, o Concello do Pino acollerá unha das xornadas máis esperadas do Nadal coa tradicional visita dos Reis Magos. Melchor, Gaspar e Baltasar percorrerán as parroquias do municipio e culminarán a súa visita coa recepción oficial no polideportivo municipal de Reboredo, ás 19.30 horas. Este día tan especial completarase co Festival Sons de Reis, no que tres DJs e o grupo Nueva Fuerza, animarán á veciñanza a gozar da música dende ás 20.30 horas ata a madrugada.

“Queremos que persoas de todas as idades poidan gozar dun día tan especial como é a véspera de Reis”, asegura o concelleiro de Deportes e Xuventude Borja Castro. “Se a cativada vai estar especialmente motivada coa visita polas parroquias de Melchor, Gaspar e Baltasar, cremos que a mocidade terá tamén o seu momento con este festival”, engade.

O obxectivo é que toda a familia poida participar no festival unha vez que remate a visita dos Reis Magos ao polideportivo de Reboredo. Na carpa climatizada situada entre a casa da cultura e o centro médico, nesta segunda edición do Festival Sons de Reis actuará o DJ Compota (20.30 horas), o grupo Nueva Fuerza (22.00 horas) e o pinchadiscos Daviz Expósito (24.00). Despois dun segundo pase do grupo Nueva Fuerza (01.30 horas) o veciño do Pino DJ ToniSalvaje (03.00 horas) será o encargado de poñerlle o broche de ouro a este Festival Sons de Reis, que rematará sobre as 04.30 da madrugada.

A música disco e latina amenizará unha noite moi especial, “para que persoas de todas as idades e familias gocen mentres agardan que os Reis Magos deixen os agasallos nas súas casas”, indica Borja Castro.

Os Reis Magos polas parroquias

O Pino encherase de maxia dende primeira hora da mañá deste luns, 5 de xaneiro, cando os tres Reis Magos comecen o seu tradicional percorrido polas parroquias do municipio.

Está previsto que a comitiva das Súas Maxestades chegue ás 10:45 horas ao campo de festas de Pereira. Logo continuará o seu percorrido habitual por Santiso (Castrofeito), Gonzar, Medín, Pastor, San Breixo e o resto das parroquias do municipio. Este amplo itinerario está pensado para que nenos e nenas de todas as parroquias saúden aos Reis, conversen con eles e lles entreguen as súas cartas. O percorrido rematará ás 18:30 horas no campo de festas de Cebreiro, asegurando que toda a veciñanza teña a oportunidade de participar.

A partir das 19:30 horas, a atención trasladarase ao polideportivo municipal de Reboredo, onde terá lugar a recepción oficial. Este acto contará cunha completa programación que inclúe animación e inchables para os máis pequenos (xa dende ás 17.30 horas) e a entrega de premios do Concurso de Postais e do II Concurso de Decoración do Nadal.

Ademais, todas as persoas asistentes poderán gozar dun ambiente acolledor con chocolate quente, churros e roscón, que se ofrecerán de forma gratuíta para celebrar a ocasión.

Unha vez que Melchor, Gaspar e Baltasar abandonen o pavillón comezará a segunda edición do Festival Sons de Reis.