O programa «Fala que fala» chega este xoves ao Liceo La Paz, en A Coruña

Radio Líder, en colaboración coa Secretaría Xeral da Lingua, segue adiante co programa educativo e multimedia «Fala que Fala», que busca fomentar o uso do galego entre o alumnado de 1º e 2º da ESO. Despois do seu paso polo IES Oroso, onde se emitiu en directo a primeira edición, o proxecto chega agora ao CPR Plurilingüe Liceo la Paz, en A Coruña.

A cita será este xoves 20 de marzo, data na que Radio Líder emitirá o segundo programa en directo desde este centro educativo, entre as 11.00 e as 13.00 horas. O obxectivo principal da iniciativa é levar a radio aos colexios e institutos, facendo que os estudantes sexan os protagonistas e animándoos a expresarse en galego de forma natural e divertida.

Durante a emisión, o alumnado participará en diversas actividades, como xogos, e realizarán unha entrevista ao influencer Miguel Mandayo. A través destas dinámicas, búscase crear un ambiente enriquecedor que impulse o uso activo do galego e fortaleza as competencias comunicativas dos estudantes.

O programa «Fala que Fala» continuará visitando outros centros educativos de Galicia ata o mes de xuño, cando se celebrará un acto de clausura para recoñecer o esforzo e a implicación do alumnado participante. Os seguintes centros que son o IES Manuel García Barros (A Estrada), o IES Ordes, o CPR Plurilingüe Vila do Arenteiro (O Carballiño) e o IES Faro das Lúas (Vilanova de Arousa).

Con esta iniciativa, Radio Líder e a Secretaría Xeral da Lingua buscan poñer en valor o traballo dos departamentos de lingua galega e ofrecer aos estudantes unha experiencia educativa motivadora e creativa.