Padrón celebrará o 23 e 24 de marzo a VIII Exposición da camelia e do bonsái

 

 

 

• O prazo para poder participar como expositor remata o luns 18 de marzo
• A feira inclúe diferentes talleres e actividades divulgativas totalmente de balde
• A entrada é libre e gratuíta

Padrón. 7-3-2024.- O Convento do Carme acolle os vindeiros días 23 e 24 de marzo a octava edición da Exposición da camelia e do bonsái. A expofeira organizada polo Concello de Padrón, na que participan numerosos expositores procedentes de todo o país, conta cunha ampla programación de actividades divulgativas. A entrada é libre e gratuíta.

As persoas interesadas en participar poderán inscribirse ata o vindeiro luns 18 de marzo a través do teléfono 686 445 520.

A exposición abre o sábado 23 a partir das 9.30 horas, momento no que os expositores comezarán a colocar as flores de cara ao acto de inauguración que está fixado para as 13.00 horas.

O primeiro dos talleres de formación terá ao bonsái como protagonista. Juan Liñares, especialista en diferentes técnicas e coidados, será o encargado de impartir este obradoiro entre as 10.00 e as 13.30 horas e as 16.00 e as 20.00 horas.

No programa da xornada destaca tamén ás 16.30 horas a demostración de ‘Home Jungle Plants. Xardíns eternos e kokedamas’ onde se poderá gozar destes terrarios únicos con plantas naturais elaboradas de maneira artesanal.

O mesmo sábado haberá máis talleres sobre cactus e crasas impartidos nesta quenda por Edmundo Novoa.

O momento máis esperado da xornada será a partir das 19.00 horas coa entrega de premios aos mellores expositores nas seis categorías: Terras de Iria, Camelia do Sar, Camelia reticulata, Camelia xapónica, Camelia híbrida e a outras especies de camelia.

Xa o domingo, o horario de apertura da exposición será as 10.00 horas, e unha hora máis tarde comezará o curso de elaboración de conservas artesanais impartido por Carme Freire.

A partir das 12.30 horas organizarase unha visita guiada, dirixida e comentada por José Freire, organizador da exposición, durante a cal explicará as diferentes variedades e o cultivo das camelias e dos bonsáis que forman parte da mostra.

O taller de poda e de froiteiras da man do profesor Afonso Touceda, profesional do cultivo,  está fixado para as 16.00 horas.

A feira baixará o pano ás 19.00 horas.

Exposicións permanentes

A VIII Exposición da camelia e do bonsái contará tamén con dúas exposicións permanentes que poderán ser visitadas polas persoas que se acheguen ata o Convento do Carme os días 23 e 24 de marzo.

Unha delas inclúe diferentes esculturas da man do artista Camilo Seira, mentres que a segunda trátase dunha exposición de pintura a cargo do alumnado de Ategal Padrón.