Padrón despide unha das Pascuas máis femininas coa xuntanza de Fillos e Amigos e o Festival de Bandas

• O alcalde, Anxo Arca, e integrantes do goberno presiden os actos da Irmandade, que entregou os recoñecementos anuais
• Emotiva homenaxe ao fundador de Picusa tras as ofrendas a Rosalía e Camilo José Cela.
• Moito público no certame que xuntou as bandas de Padrón, Vilalba e Antas de Ulla
• O paseo do Espolón vibrou co tributo a El Canto del Loco e co concerto da Banda da Loba, que presentou o seu disco ‘Lovismo’

Padrón. 27-4-2024.- Padrón despide unhas das Festas de Pascua máis femininas dos últimos anos, que comezaron co pregón da triatleta local Martina López Gestal e que contou o sábado co concerto da Banda da Loba, o grupo compostelá formado por cinco mulleres que presentou diante de numeroso público o seu último traballo discográfico, Lovismo. Nun domingo de Pascuilla soleado milleiros de persoas achegáronse ata a capital do Sar para participar no último dia das festas de 2024. A tradicional xuntanza da Irmandade dos Fillos e Amigos de Padrón e o Festival de Bandas foron dous dos actos máis destacados.

O alcalde, Anxo Arca, e membros do goberno local, presidiron a 48 xuntanza da Irmandade dos Fillos e Amigos de Padrón, que entregou as insignias de ouro e placas de honra e rendeu unha emotiva homenaxe ao fundador de Picusa, Ignacio Zaragoza Salvadó, coincidindo co 150 aniversario da posta en marcha da primeira fábrica de curtidos na Matanza. Anxo Arca, que recibiu na alcaldía a familiares do homenaxeado que asistiron ao acto, agradeceu e resaltou a aposta que no seu día fixera Ignacio Zaragoza para poñer en marcha unha fábrica que foi motor económico na comarca e segue sendo unha referencia.

Este ano, as persoas e empresa recoñecidas polos Fillos e Amigos de Padrón foron Cristina Castaño, Miguel López Mendoza, Carmen San Nicolás López, Francisco Quintá Mariño, Carlos Castaño Varela, Baicha e a Irmandade de Fillos e Amigos da Estrada. Todos eles foron saudados polo goberno local e, despois da foto de familia nas escaleiras da igrexa parroquial, xunto coa directiva da irmandade participaron na tradicional ofrenda no paseo do Espolón diante das estatuas de Rosalía e Camilo José Cela. Anxo Arca e Carmen San Nicolás depositaron a coroa de loureiro diante da estatua de Rosalía, e o alcalde, con Cristina Castaño diante da de Cela. A Coral Polifónica Padronesa cantou o himno de Padrón e a banda municipal tocou o himno galego.

Despois da recepción oficial na casa consistorial, na que o alcalde louvou a traxectoria das persoas e entidades homenaxeadas, a comitiva trasladouse ao polígono de Picusa para render homenaxe a Ignacio Zaragoza.

As agrupacións folclóricas Arreixeira e O Pedrón foron tamén protagonistas pola mañá nas actuacións que o Concello reserva para os grupos tradicionais na praza de Macías.

Festival de Bandas Capital do Sar

Pola tarde a música tradicional cedeulle a quenda a música de banda. No Festival de Bandas Capital do Sar participaron as agrupacións de Padrón, a de Vilalba e a de Antas de Ulla, nun acto que xuntou centos de persoas na praza de Macías.

Xa pola noite, as orquestras Atenas e Marbella volveron animar unhas verbenas coas que Padrón se despide das Festas de Pascua ata o vindeiro ano, despois dun fin de semana moi concorrida.

A Banda da Loba e Delcanto

O sábado pola note, A Banda da Loba presentou en Padrón o seu último traballo, Lovismo, un disco que xira arredor da idea do amor, do amor libre e os diversos amores e que lle canta ás lobiñas que se incorporan ao cubil. A actuación foi moi aplaudida por varios centos de persoas de todas as idades que asistiron ao concerto no paseo do Espolón.

Despois collería o relevo o grupo murciano Delcanto, para presentar o seu particular tributo a El Canto del Loco, a banda que liderou Dani Martín.

Antes da última verbena do Sábado de Pascuilla, que estivo amenizado pola orquestra Kubo, centos de persoas presenciaron as proxeccións sobre a fachada do convento do Carme e o lanzamento de fogos artificiais. Un problema técnico impediu lanzar a traca final, polo que os fogos non se puideron contemplar na súa totalidade.