Padrón festexa o Mes do Libro con obradoiros e contacontos

Biblioteca Municipal de Padrón

Desbotar os mitos asociados á alimentación e a banda deseñada centrarán os talleres

As actividades son gratuítas e precisan inscrición previa

A Biblioteca acolle todo o mes unha exposición de viñetas de Castelao para lembrar o 75 aniversario do seu pasamento

Padrón. 2-4-2025.- O Concello de Padrón inclúe obradoiros, un contacontos e unha solta de libros na súa programación de Abril, Mes do Libro. Ademais, durante todo abril poderase ver na biblioteca unha mostra de viñetas de Castelao.

As actividades destinadas a conmemorar o Día do Libro, que se celebra o 23 de abril, iniciaranse o mércores 9 co obradoiro Alimentos baixo a lupa, a ciencia que nutre!, unha proposta para familias realizada por Arenaria Coordinación e na que, ao longo de 90 minutos, as persoas participantes terán a oportunidade de adquirir coñecementos en nutrición e desenvolver un espíritu crítico ante moitos mitos asociados á comida. Algúns dos temas que se abordarán, baixo unha óptica científica, serán as graxas, os hidratos, os alimentos light, a lactosa ou o gluten. O obradoiro comezará ás 17.00 horas.

A programación continuará desenvolvéndose o venres 11 de abril cunha solta de libros. En colaboración coa Oficina Municipal de Voluntariado, deixaranse exemplares en distintos lugares do municipio para que a veciñanza poida levar gratuitamente aqueles que máis lle presten. Os libros son unha escolma de fondos da biblioteca e da Oficina Municipal de Voluntariado.

O martes 15 de abril haberá un novo obradoiro, que nesta ocasión terá como temática a banda deseñada. O debuxante e guionista Xosé Tomás encargarase de desenvolver unha sesión teórico-práctica na que as persoas asistentes, maiores de 12 anos, aprenderán diversos trucos da banda deseñada. A cita está fixada para as 17.00 horas.

Contos con xeito é o título do contacontos que Bea Campos levará a cabo o mércores 23, tamén a partir das 17.00 horas. Destinado a público infantil a partir de 3 anos, consistirá na narración de historias tradicionais aderezadas cun chisco de medo e moito humor para espertar o riso.

Os obradoiros e o contacontos, todos eles gratuítos, precisan inscrición previa. Realizarase presencialmente na Biblioteca Municipal de Padrón ou por teléfono nos números 981 810 761 e 645 846 479.

O Concello de Padrón anima a toda a veciñanza a achegarse neste mes á Biblioteca para coñecer o seu amplo catálogo de lecturas. Ademais, ao longo de abril poderá desfrutar dunha mostra das viñetas satíricas de Castelao, iniciativa coa que se quere homenaxear o escritor e político rianxeiro cando se fan 75 anos do seu pasamento.