“Parroquias en Movemento” supera as 150 persoas participantes en Val do Dubra

Val do Dubra, 4 de decembro de 2025 – O Concello de Val do Dubra informa de que o programa “Parroquias en Movemento”, impulsado polo Departamento de Servizos Sociais, leva en funcionamento desde setembro e conta xa con máis de 150 persoas maiores de 55 anos inscritas.

Na tarde do mércores, 3 de decembro, as actividades foron visitadas pola deputada provincial da Coruña, responsable de Política Social, Mar García. Durante a súa visita, puido comprobar de primeira man o desenvolvemento das sesións e o entusiasmo das persoas participantes. A deputada estivo acompañada do alcalde de Val do Dubra, Diego Luis Díaz, do tenente alcalde, Antonio Negreira, e das concelleiras Carmen Vilacoba e Raquel Mallo, quen destacaron a importancia do programa para fomentar a actividade física, a socialización e o benestar nas parroquias do municipio.

A iniciativa busca fomentar a actividade física, mellorar a saúde e potenciar a socialización nas parroquias do municipio. Para iso, ofrécense sesións que combinan exercicio físico suave e moderado con actividades de estimulación cognitiva, favorecendo a mobilidade articular, o fortalecemento muscular, a atención, a memoria e a coordinación.

As actividades realízanse nas parroquias que dispoñen de instalacións adecuadas e nas que se acadou o número mínimo de participantes. Actualmente, o programa está activo nos seguintes espazos:

● Erviñou – Local Veciñal
● Portomeiro – Local Veciñal
● Portomouro – Colexio de Portomouro
● San Román – Local Veciñal
● Vilariño – Local Social
● Niveiro – Local Parroquial
● Coucieiro – Casa da Escola de Maxais
● Rial – Biblioteca de Rial
● Buxán – Local Parroquial

A concelleira de Servizos Sociais, Carmen Vilacoba, destacou que “‘Parroquias en Movemento’ é unha oportunidade para dinamizar a vida social das parroquias, crear puntos de encontro e contribuír á mellora do benestar físico e emocional dos veciños sen que teñan que desprazarse do seu lugar de residencia”.

O programa conta coa colaboración da Deputación da Coruña, que apoia esta iniciativa orientada á promoción da saúde e ao envellecemento activo no ámbito rural.