O PSdeG acusa ao goberno municipal de abandonar a Casa da Xuventude e deixala “empantanada»

• A concelleira socialista Marta Abal denunciou a paralización da rehabilitación da Casa da Xuventude máis de dous anos despois de que o goberno municipal de Compostela Aberta e do BNG renunciase ao convenio coa Deputación da Coruña, unha decisión que supuxo a perda de máis dun millón de euros de fondos públicos.
• Abal acusou ao goberno municipal de “non facer nada” mentres o edificio continúa deteriorándose no centro histórico da cidade, e de tirar pola borda un proxecto estratéxico que incluía usos públicos, dinamización económica e a recuperación dun equipamento clave para a cidade.

Santiago de Compostela, 4 de febreiro de 2026. A concelleira socialista Marta Abal criticou a falta de avances na rehabilitación da Casa da Xuventude máis de dous anos despois de que o goberno municipal de Compostela Aberta e do BNG renunciase ao convenio coa Deputación da Coruña asinado na pasada lexislatura.

Segundo explicou, aquela decisión supuxo a perda de máis dun millón de euros destinados á rehabilitación do edificio, así como do compromiso da Deputación de asumir durante 25 anos os custos de mantemento e conservación. “Era unha oportunidade para garantir a conservación dun edificio que hoxe se está deteriorando”, afirmou.

Abal lembrou que desde o PSdeG xa advertiran en 2023 de que a renuncia ao convenio deixaba dúas opcións, continuar co proxecto acordado ou asumir que o inmoble quedaría paralizado, e “por desgraza, é exactamente onde estamos a día de hoxe, cun edificio empantanado, sen avances e deteriorándose a pasos axigantados”, sinalou.

A concelleira subliñou que a rehabilitación prevista non era “un simple lavado de cara”, senón un proxecto integral que incluía usos municipais e provinciais, un espazo de coworking, servizos á cidadanía e a modernización do auditorio, ademais dunha intervención para mellorar a integración urbana do edificio coa contorna.

A socialista criticou tamén que, pasado xa o ecuador da lexislatura, o goberno municipal non presentase ningunha alternativa. “Non hai proxecto, non hai calendario, non hai proposta alternativa. Hai silencio”, afirmou, mentres o edificio continúa deteriorándose no centro histórico da cidade.

Abal cualificou de “profundamente contraditorio” que o goberno local xustifique a construción de novos equipamentos pola súa suposta falta en Santiago e, ao mesmo tempo, renuncie a recuperar a Casa da Xuventude.

“O peor que pode facer un goberno é non facer nada”, concluíu Abal. A concelleira advertiu de que “Santiago non pode permitirse perder fondos por falta de inacción ou de visión” e atribuíu esta situación á “falta de capacidade de xestión” do goberno municipal.