Teo plantexa fixar os días da Ascensión e do San Martiño como festivos locais no ano 2025

• Unha vez aprobada a proposta, darase traslado do acordo á Xefatura Territorial da
   Consellería de Emprego, Comercio e Emigración
• Entre outro temas, levarase hoxe ao Pleno a aprobación da bonificación do 50% do
• Imposto sobre construcións, instalacións, obras e servizos (ICIO) á Asociación de Pais de Persoas con Diversidade Funcional de Teo (Aspamite)

Teo (A Coruña), 31 de xullo de 2024.- O Concello de Teo levará hoxe ao Pleno do mes de xullo a proposta da Alcaldía sobre os festivos locais para o ano 2025, entre outros asuntos.

Así, vista a tradición deste Concello, proporase ao Pleno da Corporación fixar como festivos locais os días da Ascensión (29 de maio) e do San Martiño (11 de novembro), dado que se que vén fixando dende hai moitos anos como festas locais neste municipio. Unha vez aprobada a proposta, darase traslado do acordo á Xefatura Territorial da Consellería de Emprego, Comercio e Emigración.

Cómpre sinalar que o 11 de novembro, festividade do San Martiño, ten unha gran importancia para o municipio teense. De feito, trátase do evento socio-cultural e económico máis importante do concello, pois celébrase unha das feiras cabalares máis  antigas de Galicia, concretamente, con máis de 500 anos de historia. Un punto de encontro de veciños e veciñas de Teo, así como de xente de fóra, que atopa no San Martiño unha festa tradicional e cultural ineludible onde ademais da famosa trata de gando tamén hai espazo para os produtos locais e de calidade.

Doutra banda, dada a proximidade coa capital galega, cómpre tamén fixar o día da Ascensión como festa local teense, posto que milleiros de veciños e veciñas de Teo acoden a celebrar esta festividade en familia.

Outros temas

Outro dos temas que se levarán hoxe ao Pleno será a bonificación do 50% do Imposto sobre construcións, instalacións, obras e servizos (ICIO) á Asociación de Pais de Persoas con Diversidade Funcional de Teo (Aspamite).

Tal e como recolle a Ordenanza fiscal reguladora deste imposto do Concello de Teo, poderase aplicar a dita bonificación naquelas obras levadas a cabo por asocacións sen ánimo de lucro, en centros destinados a asistencia e integración social ou desenvolvemento de actividades culturais de libre acceso e participación. Así, as obras a realizar por Aspamite consisten na eliminación de barreiras arquitectónicas e o acondicionamento do recinto exterior.

Así mesmo, tamén se levará a Pleno a aprobación das actas das sesións extraordinaria do pasado 30 de xuño e ordinaria do 26 de xullo; así como unha moción do Grupo Municipal do BNG de Teo sobre a proposta da CIG por un traballo digno.