Teo presenta un orzamento de 22,15M€ para 2026, 3,6 millóns máis ca no exercicio anterior

Teo (A Coruña), 26 de novembro de 2025.– O Pleno do Concello de Teo someterá hoxe a debate o proxecto de orzamentos municipais para 2026, que acadan os 22,15 millóns de euros, o que supón un incremento de 3,6 millóns respecto ao ano anterior. As novas contas manteñen o enfoque na mellora das infraestruturas e na atención ás necesidades da veciñanza.

Infraestruturas e obras municipais

O documento económico contempla 2,3 millóns de euros para o arranxo da rede viaria e outras infraestruturas de titularidade municipal, combinando fondos propios, POS e POS+. O Goberno local lembra que, no que vai de mandato, xa se executaron máis de 70 obras con recursos municipais.

Dentro desta partida inclúense tamén case 1 millón de euros para avanzar nos alcantarillados pendentes, entre eles a segunda fase do Ferreiriño, A Torre ou A Ínsua.

Outro dos grandes proxectos é a creación do novo polígono industrial da Ramallosa, para o que se consignan preto de 2 millóns de euros destinados ás expropiacións dos terreos. O plan, aprobado en xuño deste ano, abre a porta á xeración de emprego e ao impulso económico no municipio.

Servizos sociais: novo convenio e reforzo da atención

O orzamento volve incrementar por segundo ano consecutivo os fondos destinados a Servizos Sociais, que ascenden a 3,75 millóns de euros.

Entre as principais actuacións destacan:

• O reforzo do Servizo de Atención Familiar e Temperá.

• O aumento das prazas en actividades para persoas maiores.

• A posta en marcha do centro de día, para o que en 2026 se acometerá unha reforma integral do local.

• A sinatura dun novo convenio coa Asociación Acougo, co obxectivo de fomentar o acollemento familiar de menores en situación vulnerable.

• A ampliación do servizo de conciliación TeoMadurga en dúas escolas unitarias do CRA de Teo.

Cultura, turismo e comercio

O departamento de Cultura incrementa a súa partida ata os 780.000 euros, reforzando as accións de protección do patrimonio histórico-artístico.

En turismo e comercio, mantéñense as liñas de promoción e a axenda anual de eventos. O Concello tamén ultima unha guía de negocios locais, que verá a luz ao longo de 2026.

Deporte, mocidade e educación

As contas inclúen 200.000 euros para o cambio do céspede do campo municipal do Rebordelo. Tamén se reforzan os campamentos xuvenís e amplíase a oferta formativa con cursos de informática, linguaxe de signos, talleres variados e defensa persoal.

No eido educativo prevese un aumento das subvencións ás ANPAS e aos centros, ademais de continuar coas melloras estruturais. En 2025 xa se actuou en climatización de escolas infantís, substitución do portalón no CEIP Os Tilos ou instalación de videoporteiros nas cinco escolas do CRA.

Reforzo de persoal municipal

O orzamento incrementa as prazas na Policía Local e incorpora novos postos en Urbanismo, Contratación, Recursos Humanos, Informática e no Servizo de Augas, ademais da funcionarización dunha praza de auxiliar administrativo conforme á normativa estatal.

Tamén se recollen as previsións de incremento salarial e os Fondos de Acción Social para persoal funcionario, laboral e subrogado.

Contas realistas e con superávit

O Executivo local destaca que se trata dun orzamento elaborado baixo criterios de prudencia, eficacia e eficiencia. Desde o inicio do mandato, a débeda viva reduciuse de 3,4 millóns a menos de 1,8 millóns de euros, un descenso de máis de 1,6 millóns.

As contas de 2026 aprobaranse con superávit, segundo o previsto no seu Plan Económico-Financeiro.