Terio Carrera, pregoeiro da Pascua 2026 en Padrón

• O recoñecido xornalista deportivo dará o pregón o 4 de abril nun ano clave para o ciclismo na vila
• A cita equina desenvolverase no Campo da Barca a partir das 10.00 horas co espectáculo ‘El hechizo de la Rosa’ como un dos grandes atractivos

Padrón. 17-3-2026.- O Concello de Padrón deu a coñecer hoxe dous dos principais atractivos das Festas da Pascua 2026: o nome do pregoeiro e os detalles da tradicional Feira Cabalar, unha das citas máis emblemáticas do calendario festivo galego.

O xornalista deportivo Terio Carrera será o encargado de pronunciar o pregón oficial, que terá lugar o vindeiro 4 de abril, ás 21.00 horas, na Praza de Macías. A súa designación enmárcase nun ano de especial relevancia para o municipio no ámbito deportivo, no que Padrón acolle catro eventos ciclistas de primeiro nivel, consolidándose como a capital galega do ciclismo.

Con máis de corenta anos de traxectoria, Terio Carrera desenvolveu a súa carreira fundamentalmente na Radio Galega e na Televisión de Galicia, participando na cobertura de destacados eventos internacionais como o Giro de Italia, o Tour de Francia ou La Vuelta a España. Nos últimos anos, mantén unha estreita vinculación co ciclismo e co propio municipio, colaborando como speaker en eventos organizados polo exciclista Ezequiel Mosquera e en probas celebradas en Padrón como a Clásica de Pascua, as Rutas Xacobeas ou a etapa de La Vuelta que tivo lugar en 2024. Ademais, participou na condución de actos deportivos locais, reforzando a súa relación coa vila.

No marco da programación festiva, o Concello celebrará tamén o domingo 5 de abril unha nova edición da Feira Cabalar da Pascua, que terá lugar no Campo da Barca a partir das 10.00 horas. Trátase dunha cita consolidada que reúne a criadores, gandeiros, profesionais do sector e público en xeral arredor do mundo ecuestre.

A feira contará cun amplo programa de concursos morfolóxicos de distintas razas e categorías, entre os que destaca o concurso oficial da XXV Copa Galicia de Cabalos e Eguas de Pura Raza Galega, así como probas para exemplares cruzados, razas pesadas como percheróns, bretóns e hispano-bretóns, e cabalos de Pura Raza Árabe. Ademais, incluirase un concurso infantil de ponis co obxectivo de fomentar a participación da rapazada.

Como un dos principais atractivos da xornada, ás 13.00 horas celebrarase o Gran espectáculo de doma Pascua 2026, protagonizado polo espectáculo El hechizo de la Rosa, distinguido cunha medalla de prata no Salón Internacional do Cabalo (SICAB 2025), a cargo da compañía ecuestre La Magia del Caballo de León. O evento contará tamén coa participación da sección de doma de Alta Escola de Galicia Dragóns de Santiago, pertencente á Asociación Pura Raza Cabalo Galego.

Dende o Concello de Padrón anímase á veciñanza e ás persoas visitantes de toda Galicia a achegarse á vila para gozar dunha das celebracións máis destacadas da primavera galega.

PROGRAMA DE ACTIVIDADES DA FEIRA CABALAR

Domingo, 5 de abril – Campo da Barca (Padrón)

10.00 horas

• Concurso morfolóxico oficial da XXV Copa Galicia de Cabalos e Eguas de Pura Raza Galega (+3 anos)
• Concurso morfolóxico de cabalos e eguas cruzadas (+3 anos)
• Concurso infantil de ponis (sección única)
• Concurso morfolóxico de cabalos e eguas percheróns, bretóns e hispano-bretóns (sección única)
• Concurso morfolóxico de eguas e cabalos de Pura Raza Árabe (+3 anos)

13.00 horas

• Gran espectáculo de doma Pascua 2026