Unha das maiores protestas en Galicia dos últimos anos reclama o fin do xenocidio en Gaza

Radio Líder Santiago

Redacción, 5 de outubro de 2025.- Santiago de Compostela converteuse hoxe no epicentro da solidariedade con Palestina. Segundo a Coordenadora Galega de Solidariedade coa Palestina, arredor de 80.000 persoas, segundo a organización e 15.000 segundo datos da policía local, participaron na multitudinaria manifestación que percorreu as rúas da capital galega, con saída da Alameda, para denunciar o xenocidio e a ocupación do Estado de Israel contra o pobo palestino e reclamar o cese inmediato da violencia en Gaza.

A mobilización, cualificada pola organización como unha das máis masivas celebradas en Galicia nos últimos anos, reuniu a colectivos sociais, sindicatos, organizacións estudantís e milleiros de cidadáns anónimos que, con bandeiras palestinas e pancartas, reclamaron “xustiza, paz e liberdade para Palestina”.

Durante o acto, os portavoces da Coordenadora insistiron en que a comunidade internacional non pode permanecer allea diante das violacións de dereitos humanos que está a sufrir a poboación civil palestina e esixiron que se poña fin ás relacións diplomáticas e comerciais co Estado de Israel mentres continúe a ofensiva.

A marcha percorreu as principais rúas compostelás nun ambiente de firmeza reivindicativa e tamén de emotividade, con constantes mostras de solidariedade cara ás vítimas en Gaza.