Unha faixa xigante di “Vertedoiro Niveiro NON” en Val do Dubra nunha nova manifestación

Unha vez máis os veciños da Comarca de Santiago saen á rúa en Val do Dubra para dicir NON ao vertedoiro, nunha manifestación convocada pola Asociación Medioambiental de Niveiro.

Coa escusa do proxecto de restauración da antiga canteira de Pedra Facha, unha empresa privada pretende construir en Niveiro un vertedoiro de residuos a ceo aberto e, tanto os veciños e veciñas de Val do Dubra coma dos concellos lindeiros están en contra.

Segundo os veciños e os membros da asociación este proxecto é un “sen sentido que afectará gravemente tanto o medioambiente como a saúde das persoas”.

Esta protesta é unha nova reivindicación dentro das moitas actividades que esta Asociación está levando a cabo.

Na xornada de hoxe fíxose tamén un acto especial onde os veciños asistiron á colocación dunha faixa xigante no centro da vila, onde se pode ler “Vertedoiro Niveiro Non” que os mesmos quixeron colgar como símbolo de rexeitamento ao proxecto e bandeira da súa loita.

A Asociación Medioambiental de Niveiro e a Plataforma Niveiro Veciños veñen de manifestar que non pararán as protestas ata ter certeza de que este proxecto está paralizado.