Val do Dubra reitera ante a Xunta a súa oposición ao vertedoiro de Niveiro

O alcalde de Val do Dubra en Radio Líder Santiago | Arquivo

O pasado venres 21 de febreiro, o Concello de Val do Dubra presentou formalmente o seu rexeitamento ao proxecto de rehabilitación, peche e abandono da canteira de Niveiro, promovido por Francisco Gómez y Cia, S.L.

A decisión fundaméntase nos anteriores informes municipais e o elaborado pola empresa especializada TYSGAL, que poñen de manifesto diversas deficiencias na documentación presentada e a incompatibilidade do proxecto cos valores ambientais, paisaxísticos e socioeconómicos da zona.

Un dos puntos máis preocupantes é a proposta de construción dun vertedoiro de residuos non perigosos, que xeraría un impacto negativo significativo no territorio por diferentes motivos que se detallan de xeito individual.

Ademais, evidénciase a ausencia de licenza social para a súa execución, o que reflicte o rexeitamento da veciñanza a esta actuación.

Por este motivo, o Concello de Val do Dubra solicita a Minas que o proxecto non sexa autorizado e insta á promotora a presentar unha nova proposta que priorice a restauración ambiental do espazo degradado, garantindo a protección do entorno e o benestar da comunidade.

Así mesmo, foron rexistradas e presentadas na Xunta preto de 2.500 alegacións en colaboración coa Asociación Medioambiental de Niveiro, das cales 421 foron a través do Concello de Val do Dubra.