Val do Dubra reivindica o rural nunha nova edición das Feiras do Abril, do 4 ao 6 de abril

• O evento celebrarase os días 4, 5 e 6 de abril cun amplo programa que inclúe artesanía, gando, obradoiros, humor, música e gastronomía

Val do Dubra volverá converterse nun punto de encontro co rural coa celebración dunha nova edición das Feiras do Abril, que terán lugar os días 4, 5 e 6 de abril no espazo público de San Lourenzo de Bembibre. A cita, xa consolidada no calendario local, reunirá durante tres xornadas unha completa programación que combina tradición, divulgación e lecer para todos os públicos.

Ao longo de toda a fin de semana, en horario de 10:00 a 20:00 horas, desenvolveranse propostas como o mercado de artesanía, a exhibición de maquinaria agrícola, xogos tradicionais e servizo de polbeira.

A programación arrincará o sábado 4 coa inauguración oficial ás 12:00 horas, acompañada dunha actuación de regueifa. A xornada continuará cunha degustación de produtos locais ás 13:00 horas e diversas actividades ao longo da tarde, entre elas o obradoiro de estampaxe de panos tradicionais (16:00–20:00 h), a charla sobre horta sostible a cargo de Nuska Chousa (17:00 h), o monólogo de Isi (18:30 h) e a sesión musical con Grupo Claxxon e Disco Móbil CDC (20:00 h).

O domingo 5 estará marcado pola exposición de gando, que se desenvolverá entre as 10:00 e as 14:00 horas, así como pola continuidade dos obradoiros de artesanía (10:00–19:00 h), as xornadas de tiro ao arco (11:00–17:00 h) e a demostración de cestería con Sara Viña (11:00 h).

De forma paralela, durante as feiras haberá outras actividades como a ruta cabalar (11:30 h), un simulacro de Protección Civil (12:00 h), o obradoiro de extinción de incendios para a rapazada da man da AVPC Val do Dubra (12:30 h), a demostración de inoculación de shiitake en tronco impartido por Fungos da Cova (12:30 h), a actuación do Trío Alborada (14:00 h) e un faladoiro sobre apicultura con Alfonso Priegue (16:30 h).

A programación pecharase o luns 6 coa celebración do mercado mensual e da tradicional Festa da Empanada, que contará tamén con polbeira e actuación musical a cargo do Dúo Matices.

As Feiras do Abril confírmanse así como un espazo de promoción do produto local e de posta en valor da cultura e tradicións do rural galego, consolidándose como unha cita de referencia na comarca.

Nota: Para participar nalgúns dos obradoiros e actividades será preciso formalizar a inscrición, dado que hai prazas limitadas. Esta realizarase a través do correo electrónico, enviando nomes, apelidos e idade a feiras@valdodubra.gal, segundo se vaian anunciando nas redes e na web do concello. A adxudicación de prazas farase por orde de inscrición.