Veciños de Sigüeiro convocan unha concentración en defensa da sanidade pública

A preocupación pola situación da atención sanitaria no centro de saúde de Sigüeiro (Oroso) levou a veciñanza a organizar unha concentración este sábado día 11 ás 10:30 da mañá diante das instalacións médicas.

Segundo trasladou Isabel Míguez, presidenta da asociación de veciños da Gándara, a mobilización nace como resposta ao empeoramento do servizo nos últimos meses. “O habitual agora é ter que esperar ata 15 días para conseguir unha cita médica”, denuncia, ao tempo que sinala outras dificultades como o peche do centro os sábados.

A convocatoria prodúcese tamén nun contexto marcado polas recentes mobilizacións do persoal sanitario, que levou a cabo xornadas de folga para reclamar melloras nas súas condicións laborais. A este respecto, desde a asociación veciñal subliñan que comprenden as reivindicacións dos profesionais, pero consideran que a situación está a repercutir directamente na calidade da atención aos pacientes.

“Non se trata de cores políticas, senón de defender un dereito básico que afecta a todos os veciños e veciñas”, explica Míguez, quen fai un chamamento á participación cidadá. “Cantos máis sexamos, máis forza teremos para que se escoite a nosa voz”.

Desde a organización consideran que o peche de centros ou a redución de servizos non é a solución, e reclaman medidas que garantan unha atención sanitaria accesible e de calidade para toda a poboación.

A concentración está aberta a toda a cidadanía e pretende visibilizar o descontento social ante unha problemática que, segundo os convocantes, vai en aumento.