Vive a maxia do Nadal no comercio local de Compostela

Compostela énchese de maxia co Nadal: o CCA lanza unha campaña con concursos, sorteos e animación na rúa

A Asociación Comercio Punto Compostela CCA presentou este mércores 26 a súa campaña especial de Nadal baixo o lema “Vive a Maxia do Nadal no Comercio Local”, unha iniciativa destinada a dinamizar as compras festivas e reforzar o papel do comercio de proximidade mediante actividades, animación polas rúas e varios sorteos abertos á cidadanía.

Concurso de Fotografía en Instagram

A acción estrela da campaña será un concurso fotográfico en Instagram, dirixido a persoas maiores de 18 anos. Para participar, será necesario publicar unha fotografía realizada cos elfos que percorrerán os comercios asociados e diferentes rúas da cidade para animar as compras nestas datas.

As condicións para participar son as seguintes:

• Publicar unha fotografía coa temática proposta.
• Etiquetar a conta oficial da entidade: @a_comercio_punto_compostela.
• Ter o perfil público no momento da verificación.
• Subir unha soa imaxe por persoa.

O prazo para publicar as fotografías abranguerá do 16 ao 23 de decembro, ambos incluídos. A revisión dos “likes” e a deliberación da Xunta Directiva terá lugar o 26 de decembro.

Como incentivo, sortéanse dúas cestas de Nadal valoradas en 250 euros cada unha:

• Premio 1: para a fotografía con maior número de “likes”.
• Premio 2: para a imaxe seleccionada pola Xunta Directiva segundo criterios de creatividade, orixinalidade ou calidade estética.

Segundo sorteo: premiando as compras no comercio local

A campaña complétase cun segundo sorteo destinado a fomentar o consumo nos establecementos adheridos. Todas as persoas que realicen compras entre o 1 e o 16 de decembro poderán participar depositando o ticket orixinal na urna habilitada en cada comercio, indicando no reverso o nome e o teléfono.
Cada comprador poderá introducir un ticket por cada compra realizada, sen importe mínimo.

Neste caso, sortearanse cinco tarxetas prepago de 100 euros cada unha.

Impulso ao comercio de proximidade

A Asociación Comercio Punto Compostela CCA subliña que esta campaña nace co obxectivo de “promover un Nadal vivo, participativo e centrado no valor do comercio local”, impulsando a actividade económica da cidade e ofrecendo propostas lúdicas tanto para a veciñanza como para as persoas que visitan Compostela nestas datas.