O CPEIG celebra este venres a XVIII Noite da Enxeñaría en Informática de Galicia

Santiago de Compostela, 11 de xuño de 2026.- O Colexio Profesional de Enxeñaría en Informática de Galicia (CPEIG) celebrará mañá venres, 12 de xuño, a XVIII edición da Noite da Enxeñaría en Informática de Galicia, unha gala que terá lugar a partir das 19:00 horas no Hotel OCA Puerta del Camino de Santiago de Compostela e na que se entregarán os premios anuais da profesión.

O evento, considerado unha das citas de referencia do sector tecnolóxico galego, reunirá a preto de 500 convidados procedentes do ámbito empresarial, universitario, institucional e profesional. A gala ten como obxectivo poñer en valor a contribución da enxeñaría informática ao desenvolvemento da sociedade da información e visibilizar iniciativas innovadoras vinculadas ás tecnoloxías da información e das comunicacións.

A apertura da XVIII Noite correrá a cargo do presidente do CPEIG, Fernando Suárez, e contará coa presenza de destacadas autoridades, entre elas o delegado do Goberno en Galicia, Pedro Blanco; o conselleiro de Facenda e Administración Pública, Miguel Corgos; o conselleiro de Educación, Ciencia, Universidades e Formación Profesional, Román Rodríguez; o director da Axencia para a Modernización Tecnolóxica de Galicia (AMTEGA), Damián Rey; a deputada provincial da área de Sectores Produtivos da Deputación da Coruña, Cristina Capelán; o alcalde de Ames, Blas García; a reitora da Universidade de Santiago de Compostela, Rosa Crujeiras; e a vicerreitora de Estudantes e Empregabilidade da Universidade da Coruña, María José Lombardía, entre outras personalidades e representantes do ecosistema TIC galego.

A condución da gala estará a cargo do xornalista deportivo e presentador da TVG, Terio Carrera. Como artista convidado participará o recoñecido ilusionista e mentalista Jorge Luengo, gañador do Premio Mundial de Maxia en 2009 e habitual colaborador en programas de televisión como MasterChef Celebrity ou Atrápame se podes: Celebrity.

Premiados da XVIII Noite da Enxeñaría en Informática de Galicia

Na presente edición, o CPEIG recoñece a destacadas persoas, entidades e iniciativas polo seu labor na promoción da innovación, o emprendemento, a transformación dixital e o desenvolvemento sostible:

• Premio Iniciativa Emprendedora: Startup Galicia.
• Premio Ada Byron: Virginia Mato, doutora en Informática e codirectora da Cátedra ALDABA-WIB.
• Premio Traxectoria Profesional (a título póstumo): Paula Montoto.
• Premio Especial CPEIG – En Memoria de Hernán Vila: José Valiño e José Manuel García Oya.
• Premio Iniciativa Empresarial: Sparc Foundry.
• Premio Innovación Tecnolóxica no Ensino: Loomi.
• Premio Obxectivos de Desenvolvemento Sostible (ODS): Cátedra INDITEX-UDC de IA en Algoritmos Verdes.
• Premio Iniciativa da Administración: Gerencia de Informática da Seguridad Social.
• Premio e-Inclusión: OdiseIA.
• Premio Colaboración Interadministrativa: Concello de Ames.
• Premio Colexiada/o de Honra: Ramón López de Mántaras.
• Premio Traballo Fin de Máster: David Zambrana, pola plataforma ShoppyEye.
• Premio 18º Aniversario CPEIG-A NOITE: Dell Technologies, DXC Technology e Taisa.
• Premio Impulso Dixital Galicia: Consellería de Educación, Ciencia, Universidades e Formación Profesional da Xunta de Galicia.

Con esta nova edición, o CPEIG reafirma o seu compromiso coa promoción do talento, a innovación e a excelencia profesional, consolidando a Noite da Enxeñaría en Informática de Galicia como o principal punto de encontro anual do ecosistema tecnolóxico galego.