“Non me pasa”, o novo videoclip de Fuego Lolita, estrearase en primicia en Radio Líder Santiago

• O videoclip estrearase este venres na nosa web mentres a banda prepara actuacións nas festas de San Pedro, no Festigal, en Negreira e no Rock in Rian

A banda compostelá Fuego Lolita, representada nos estudos de Radio Líder Santiago por Adrián Caride e Daniel Balsa, presentou o seu novo videoclip, correspondente ao tema “Non me pasa”, que se estreará este venres 26 de xuño en primicia na web da emisora. O grupo, gañador da sétima convocatoria de Onda Chicha e finalista do ChichaFest 2026, continúa sumando novos proxectos nun momento especialmente destacado da súa traxectoria.

Durante a entrevista, os dous integrantes da formación fixeron balance dunha etapa marcada polo impulso acadado tras o seu paso por Onda Chicha, unha experiencia que, segundo recoñeceron, lles abriu novas oportunidades e lles permitiu chegar a escenarios e festivais que inicialmente non imaxinaban.

“Foi espectacular”, aseguraron ao lembrar a súa actuación na final do ChichaFest, celebrada na Sala Capitol. Para os integrantes de Fuego Lolita era a primeira vez que actuaban nun recinto destas dimensións, unha experiencia que cualificaron como única e que lles permitiu compartir escenario con outras bandas emerxentes nun dos espazos musicais máis emblemáticos de Santiago.

Un videoclip gravado en Negreira

A principal novidade da visita aos estudos de Radio Líder foi a presentación de “Non me pasa”, o segundo adianto do futuro EP da banda. Trátase dun tema que continúa explorando, desde o humor e a retranca que caracterizan ao grupo, situacións e experiencias propias da etapa universitaria e das relacións persoais.

O videoclip foi gravado en Negreira e contou coa participación de numerosos amigos e persoas achegadas á banda. Adrián Caride e Daniel Balsa explicaron que a produción supuxo un importante reto organizativo, xa que ningún dos integrantes tiña experiencia previa neste tipo de proxectos audiovisuais. A pesar diso, destacaron a implicación de todas as persoas que colaboraron na gravación e agradeceron especialmente o traballo da videógrafa e montadora Iria, así como o apoio recibido para facer realidade a iniciativa.

Segundo avanzaron, o videoclip busca transmitir a esencia de Fuego Lolita: unha banda que aposta por cancións desenfadadas, con enerxía e sentido do humor, pensadas para facer bailar ao público e desconectar dos problemas cotiáns.

Un verán cargado de concertos

O grupo afronta agora un dos veráns máis intensos desde a súa creación. A primeira cita será este venres 26 de xuño ás oito da tarde na Praza do Cruceiro, dentro da programación das festas de San Pedro de Santiago.

Posteriormente, Fuego Lolita abrirá os concertos do Festigal o próximo 24 de xullo tras resultar gañador do concurso Novos Valores, unha oportunidade que consideran especialmente importante dentro da súa curta traxectoria musical. “Abrir o Festigal para nós é tremendo. É un concerto enorme e unha oportunidade espectacular para unha banda como Fuego Lolita”

Ao día seguinte, o 25 de xullo, actuarán nas festas do Cristo de Negreira e tamén teñen confirmada a súa presenza no Rock in Rian, en Rianxo, despois de resultar unha das bandas premiadas no certame que dá acceso ao festival. Ademais, avanzaron que nas próximas semanas poderían anunciarse novas datas para completar unha intensa programación estival.

O primeiro EP, cada vez máis preto

Paralelamente aos concertos, a banda continúa traballando no lanzamento do seu primeiro EP. O traballo, composto por cinco cancións, xa está gravado e atópase actualmente en proceso de produción e masterización. Antes da súa publicación, o grupo prevé lanzar un terceiro sinxelo que servirá de adianto ao disco.

Os músicos definiron este primeiro EP como un proxecto marcado pola diversidade de estilos, pero cun fío condutor común: cancións dinámicas, con humor e pensadas para o directo. Un traballo que permitirá coñecer mellor a identidade dunha banda nacida da unión de mozos procedentes de distintos puntos de Galicia que acabaron atopándose en Santiago de Compostela arredor dunha mesma paixón pola música.