O Hockey Club Raxoi reclama máis apoio para o deporte feminino compostelán

O presidente do Hockey Club Raxoi analiza os retos deportivos e económicos do único equipo feminino compostelán que compite na máxima categoría nacional e reclama maior apoio institucional e empresarial para asegurar a súa continuidade.

O Hockey Club Raxoi afronta unha nova tempada na OK Liga Iberdrola coa ilusión de consolidarse entre a elite do hóckey español, pero tamén coa preocupación que supón manter un proxecto deportivo de máximo nivel nun deporte minoritario.

Así o explicou en Radio Líder Santiago o presidente da entidade, Miguel Rodríguez del Corral, quen definiu con claridade a realidade que vive o club.

«Sacar adiante un equipo de categoría nacional nun deporte minoritario, nunha cidade como Santiago, é realmente complexo», afirmou, incidindo en que detrás do proxecto hai unha directiva formada por persoas que compatibilizan o traballo, a vida familiar e a xestión diaria da entidade.

O máximo responsable lembrou que o Raxoi é un club eminentemente de base que, ademais, conta co valor engadido de representar a Santiago na máxima categoría do hóckey feminino estatal.

A permanencia continúa sendo o principal obxectivo deportivo, pero para alcanzala resulta imprescindible asegurar antes a estabilidade económica.

«Conseguir o orzamento é empezar de cero cada tempada», resumiu Rodríguez del Corral, explicando que o salto entre a OK Prata e a OK Liga multiplica varias veces os custos da competición, especialmente polos desprazamentos continuos a Cataluña.

Segundo explicou, só as viaxes poden consumir un importe equivalente ao orzamento completo dun equipo da segunda categoría.

Ás dificultades económicas súmase a falta de instalacións deportivas suficientes na cidade.

«Estamos moi limitados a nivel de instalacións», sinalou, lembrando que tres clubs de hóckey comparten practicamente unha única infraestrutura, unha realidade que considera consecuencia dunha planificación insuficiente ao longo das últimas décadas.

O presidente tamén mostrou a súa preocupación pola diminución das achegas públicas previstas para a nova tempada respecto da campaña anterior.

«Inicialmente iamos percibir menos cartos que no 2024 estando na mesma competición», explicou, aínda que asegurou confiar en que a situación poida reconducirse mediante o diálogo coas administracións.

No ámbito privado, o club continúa chamando á implicación do tecido empresarial compostelán.

«É moi difícil conseguir apoio privado», recoñeceu, facendo un chamamento ás empresas para colaborar cun proxecto que representa ao deporte feminino de elite na cidade.

Rodríguez del Corral puxo especialmente en valor o compromiso dos pequenos patrocinadores e agradeceu o respaldo de empresas como Zona Techo, ás que cualificou como un exemplo de responsabilidade co deporte minoritario.

A nivel deportivo, o Raxoi prepara xa unha tempada na que haberá incorporacións para reforzar un grupo que seguirá mantendo como sinal de identidade o traballo colectivo.

O presidente tamén reflexionou sobre a realidade do deporte feminino, onde moitas xogadoras chegan moi novas á máxima categoría e se ven obrigadas a abandonar antes a competición pola dificultade de compatibilizar o deporte coa vida laboral.

«O obxectivo deste ano é dobre: manternos e seguir dando a coñecer o hóckey sobre patíns na cidade», concluíu.

Con ese horizonte, o Hockey Club Raxoi afronta unha nova campaña convencido de que o éxito deportivo dependerá tanto do rendemento na pista como da capacidade de seguir sumando apoios para un proxecto que representa ao deporte feminino compostelán na máxima categoría nacional.