O BNG de Ames elixe como nova Responsable Local a Paula Castro

• A Asemblea Local, aprobou por unanimidade a candidatura de Paula Castro, nun acto no que se recoñeceu o traballo realizado polo ata o de agora Responsable, Alberto Ramos.

Ames, 31 de xullo de 2026. A xornalista Paula Castro, veciña de Ames desde hai 22 anos, é licenciada en Historia Contemporánea e en Ciencias de Información pola Universidade de Santiago e experta en Igualdade pola UNED. Logo de pasar por varios medios de comunicación, nomeadamente A Nosa Terra, na que traballou durante case unha década, actualmente desenvolve a súa actividade no Gabinete de Comunicación da Confederación Intersindical Galega (CIG).

Elixida por unanimidade pola asemblea local, Castro é militante do BNG desde hai preto de 30 anos, foi responsable do BNG da comarca de Santiago e membro do Consello Nacional en varias ocasións e formou parte das candidaturas do BNG de Ames en diferentes momentos.

Con longa experiencia política, a nova responsable local reforzará o labor da formación de cara ás eleccións municipais nas que a organización nacionalista se presenta co obxectivo de gobernar.

Neste sentido o BNG de Ames reafirma o seu compromiso coa veciñanza e pon á súa disposición un equipo sólido, cohesionado e con solvencia para a defensa dos intereses do concello,do que Alberto Ramos seguirá formando parte, tanto no Consello Local como no traballo diario.