Melide unirá historia, comercio e gastronomía co Mercado Medieval e o Mercamelide na Rúa

A vila ofrecerá do 7 ao 9 de agosto máis de medio cento de actividades, descontos en 19 comercios e un sorteo de 1.500 euros en premios. En Radio Líder Santiago, o tenente de alcalde e concelleiro da Área Económica, Xosé Igrexas, repasa as claves destas dúas citas.

Melide vivirá do 7 ao 9 de agosto unha das fins de semana con maior actividade do verán coa celebración do Mercado Medieval e dunha nova edición do Mercamelide na Rúa. Ambas iniciativas volverán compartir protagonismo para dinamizar a vila, atraer visitantes e apoiar o comercio de proximidade. Así o explicou en Radio Líder Santiago o tenente de alcalde e concelleiro da Área Económica, Xosé Igrexas, quen destacou que ambas propostas «abarcan dous aspectos diferentes» e permiten reforzar tanto a actividade económica como o atractivo da vila.

O responsable municipal puxo especialmente o foco no significado do Mercado Medieval, unha celebración que, segundo explicou, permite lembrar e poñer en valor o importante papel que desempeñou Melide durante a Idade Media. Como exemplo, lembrou a Asemblea de Melide, celebrada a comezos do século XVI, cando a nobreza galega se reuniu na vila para reclamar ao rei Carlos I de España e V de Alemaña a recuperación do voto nas Cortes. Ao seu xuízo, esta cita tamén acompaña o traballo que se está a realizar para recuperar e revitalizar o casco antigo. «O Mercado Medieval é unha reminiscencia da importante historia e cultura que tivemos ao longo da Idade Media», asegurou.

A programación reunirá máis de medio cento de actividades repartidas ao longo de tres días. O Mercado Medieval abrirá as súas portas o venres 7 de agosto ás 19.00 horas, cando o centro histórico comezará a encherse de personaxes medievais, música e animación itinerante. A primeira xornada incluirá as intervencións de Bufón Vermello, as danzas medievais, o espectáculo ‘Nazareth, a meniña do lume’ e rematará con ‘Cazadores de Dragóns’, un espectáculo nocturno de lume e malabares.

O sábado, o mercado e o espazo infantil abrirán ás 11.00 horas. Durante a mañá haberá pasarrúas, actuacións de rúa e outros espectáculos, mentres que pola tarde o mercado reabrirá ás 19.00 horas e o espazo infantil ás 19.30. A programación continuará con gaitas, fanfarras, tambores, teatro, música e animación, antes dunha nova representación de ‘Cazadores de Dragóns’, que volverá ser o momento máis destacado da noite. O domingo, tanto o mercado como o espazo infantil abrirán de novo ás 11.00 horas e retomarán a súa actividade pola tarde desde as 18.30, antes do pasarrúas final das 21.45 horas, no que participarán todas as compañías. Durante toda a fin de semana permanecerán tamén abertos o espazo infantil con xogos tradicionais e atraccións, así como a exposición de antigos oficios.

Igrexas salientou tamén a variedade da programación e destacou como principal novidade o espectáculo nocturno arredor dun dragón xigante, con lume e efectos visuais, que poderá verse tanto o venres como o sábado. «É unha programación moi variada, moi completa», resumiu, ao tempo que animou á cidadanía a achegarse a Melide para vivir «un fin de semana moi interesante».

19 comercios e 1.500 euros en premios

Coincidindo co Mercado Medieval celebrarase unha nova edición do Mercamelide na Rúa, organizado pola Asociación de Empresarias e Empresarios da Terra de Melide (ASETEM), en colaboración co Concello. A campaña contará con 19 comercios participantes, que sacarán os seus produtos ao exterior dos establecementos con descontos especiais e estarán identificados para facilitar o percorrido da clientela. O Concello colabora tamén cun sorteo de 1.500 euros en vales de compra, que se celebrará o 11 de agosto. Repartiranse cinco premios de 100 euros e vinte de 50 euros, que poderán gastarse nos propios establecementos participantes ata o 21 de agosto. Ademais, os comercios asociados repartirán rascas con agasallos promocionais.

O concelleiro puxo en valor a fortaleza do tecido comercial melidense e a variedade de sectores que participan nesta campaña, desde moda e calzado ata electrodomésticos, floristerías, artigos deportivos ou establecementos especializados. «Temos un sector comercial moi variado e importante e, por tanto, aquí podes mercar todo o que desexes», afirmou.

Para Igrexas, a coincidencia destas dúas citas responde a unha estratexia clara. Por unha banda, explicou, o Mercamelide na Rúa constitúe unha acción de apoio ao comercio de proximidade. Pola outra, convértese nun escaparate para dar a coñecer a oferta comercial da vila ás numerosas persoas que pasan por Melide nestas datas, entre elas peregrinos dos Camiños Francés e Primitivo, turistas, emigrantes e visitantes. «Ter engalanadas as rúas e promocionar o comercio danos esa visión para que a xente coñeza o que temos e queira volver», sinalou.

Como peche, Igrexas animou á veciñanza, aos visitantes e ás persoas que regresan á vila durante o verán a achegarse a Melide para vivir estas dúas grandes citas. «Non hai escusa para non achegarse a Melide esta fin de semana, porque podes atopar lecer, comercio e, por suposto, gastronomía», concluíu.