O Bar O Encontro de Brión reparte máis de 15.500 euros no Euromillones

O establecemento da avenida dos Ánxeles selou un dos dous boletos premiados en España coa Segunda Categoría no sorteo do 1 de setembro

A sorte volveu sorrir a Brión. O Café Bar O Encontro, situado na avenida dos Ánxeles, vendeu un dos dous boletos premiados en España coa Segunda Categoría do Euromillones no sorteo celebrado o pasado 1 de setembro.

O boleto agraciado recibirá un premio de 15.502,86 euros. Polo momento descoñécese a identidade da persoa afortunada, aínda que o propietario do establecemento, Óscar Esparís Agra, considera que podería tratarse dunha persoa da zona que participa habitualmente neste tipo de sorteos.

Non é a primeira vez que O Encontro reparte fortuna entre a súa clientela. En 2020, o establecemento xa selara un primeiro premio da Lotería Nacional e, ao longo dos seus case 30 anos de actividade, entregou tamén outros premios.

Este novo acerto volve situar O Encontro como un dos establecementos afortunados do municipio e deixa en Brión máis de 15.500 euros.