Alcalde de Vedra: “Manter o que temos será o gran reto dos concellos nos próximos anos”

• A metade da lexislatura en Vedra chega con reformas clave en marcha: un novo centro de saúde, a ampliación da rede de auga e a tramitación dun centro de día. O rexedor confirma a súa intención de presentarse de novo en 2027.

Redacción, 22 de xullo de 2025 — O alcalde de Vedra, Carlos Martínez, fixo un balance detallado da lexislatura nunha entrevista emitida por Radio Líder Santiago e conducida polo xornalista Álvaro Veiga. Con 14 anos á fronte do goberno local, Martínez repasou os principais logros e retos afrontados nestes dous primeiros anos, deixando titulares clave sobre a xestión municipal, as prioridades sociais e o futuro político do concello.

“Foi un traballo soterrado, ingrato, impopular… pero necesario”, explicou o alcalde ao referirse ás decisións económicas tomadas para garantir a continuidade dos servizos municipais. A revisión de taxas e prezos públicos foi, segundo dixo, unha medida ineludible: “Non queríamos recortar servizos nin cargar os veciños cos impostos, así que buscamos un punto intermedio”.

Un novo centro de saúde, en marcha

Un dos anuncios máis importantes da conversa foi a reforma integral do Centro de Saúde de Vedra, que xa conta con convenio asinado e está ultimando o proxecto técnico. “Pensamos que as obras poderán comezar en 2026, probablemente cara á primavera”, apuntou Martínez, destacando a colaboración da Xunta de Galicia neste proxecto “tan demandado”.

A preocupación polos servizos sanitarios tamén se estende ao día a día das persoas maiores e dependentes. Por iso, o Concello está a tramitar un novo Centro de Día, previsto para reconverterse a partir dun espazo xa existente: a antiga Casa das Artes, xunto á gardería de San Fins de Sales. “É unha necesidade imperiosa. Hoxe en día, a conciliación familiar non é só cos nenos: tamén cos maiores ou enfermos”.

A entrevista tamén serviu para abordar o estado das pistas e vías municipais. Segundo o rexedor, “estamos asfaltando e reparando moitas pistas grazas aos programas das distintas administracións, pero non poderemos facer todo; esperamos que os veciños vexan avances reais neste mandato”.

A extensión da rede de auga potable e o alcantarillado é outro dos eixos fundamentais da acción de goberno. Actualmente, un 70% da poboación pode acceder á rede xeral de auga, pero aínda existen zonas sen servizo. “Queremos que, polo menos, todas as parroquias conten cun punto de conexión. O noso obxectivo é chegar ao 90% ou incluso ao 100%”.

No que respecta ao lixo e á reciclaxe, Martínez destacou a implicación veciñal: “Temos preto de mil contedores e estamos notando un incremento brutal na recollida do plástico. Iso é bo, pero tamén eleva os custos”.

Burocracia asfixiante e persoal ao límite

O alcalde non escatimou críticas ao funcionamento da administración pública, especialmente no ámbito da tramitación de subvencións e fondos europeos. “Os concellos somos a administración máis próxima, pero temos que soportar unha burocracia excesiva. Moitas veces as entidades acaban renunciando ás axudas pola complexidade técnica”, advertiu.

Neste punto, quixo poñer en valor o traballo do equipo municipal: “Os empregados públicos de Vedra son auténticas máquinas. Grazas a eles, a administración segue funcionando”.

Carlos Martínez tamén falou sobre o seu futuro político, confirmando que se volverá presentar nas eleccións municipais de 2027. “Mentres manteña a ilusión e estea ao 100%, seguirei. Queremos resolver moitas cousas que aínda están pendentes”, declarou. E engadiu unha reflexión: “Un alcalde non gaña unhas eleccións; perdeas. Porque cos anos, normalmente fas máis inimigos que amigos, por non chegar a todo”.

Con oito edís no grupo de goberno (PP), tres do BNG e dous do PSdeG, o Concello de Vedra afrontará un cambio no número de concelleiros na vindeira lexislatura, reducindo de 13 a 11 pola caída demográfica: “O ano pasado naceron 25 persoas e morreron máis de 60. É unha tendencia moi difícil de reverter”.

A vida cultural e asociativa é, segundo Martínez, unha das maiores riquezas de Vedra. “O gran reto dos próximos anos será manter o que temos, porque cada vez é máis difícil”, afirmou. Apuntou tamén a importancia do terceiro sector: “A administración ten que deixar de estorbar e pasar a axudar. As entidades sociais chegan antes e mellor”.