Arzúa estrea unha nova área de descanso na Fervenza das Hortas

Arzúa, 15 de xaneiro de 2026.– A Fervenza das Hortas, situada na parroquia de Dombodán, conta xa cunha nova área de descanso tras a finalización das obras de acondicionamento impulsadas polo Concello de Arzúa a través da súa Concellería de Turismo. A actuación permitiu mellorar de maneira notable a baixada á fervenza, incorporando un espazo de descanso, aparcadoiro, novo mobiliario, plantación de árbores e unha mellora xeral dos accesos.

O proxecto contou cun orzamento total de 37.772,79 euros, dos cales 30.000 euros foron financiados pola Axencia de Turismo de Galicia mediante unha subvención concedida en réxime de concorrencia competitiva. O Concello asumiu o importe restante.

A concelleira de Turismo, Begoña Balado, destacou a importancia desta intervención para o futuro turístico do municipio. “Con esta actuación damos un paso máis na posta en valor dos nosos espazos naturais, facéndoos máis accesibles, seguros e atractivos tanto para a veciñanza como para as persoas que nos visitan”, sinalou.

Balado subliñou tamén que “a Fervenza das Hortas é un enclave de gran beleza natural que merecía unha mellora destas características, sempre desde o respecto ao entorno e apostando por un modelo de turismo verde e sostible”. Ademais, puxo en valor o traballo técnico realizado: “Conseguimos esta subvención grazas a presentar un proxecto completo, ben fundamentado e cunha tramitación áxil, o que demostra a eficacia do traballo que se está a facer desde o Concello”.

Desde o goberno local destacan que esta intervención permitirá seguir reforzando a oferta de turismo de natureza en Arzúa, mellorando a experiencia das persoas visitantes e contribuíndo á conservación e desfrute responsable dun dos espazos naturais máis singulares do municipio