As familias de La Salle presionan a Raxoi para recuperar o dobre sentido nas Rodas

Google Maps

O atropelo dun alumno do colexio La Salle o pasado martes volveu situar no centro do debate a ordenación do tráfico no entorno de Bonaval e San Roque. O menor foi alcanzado por un vehículo nun paso de peóns situado na confluencia da rúa de Bonaval coa Costa de San Domingos, cando saía do centro educativo.

Desde a Asociación de Nais e Pais de La Salle consideran necesario revisar a actual distribución da circulación e volven reclamar ao Concello de Santiago que recupere o dobre sentido na rúa das Rodas. Ao seu xuízo, esta medida permitiría aliviar o volume de vehículos que agora se concentra na Costa de San Domingos e en Valle-Inclán.

O presidente da ANPA, Víctor Fuentes, desvincula directamente o accidente dos cambios de tráfico postos en marcha de maneira provisional polo Concello, xa que sinala que o atropelo debeuse a un despiste do condutor e que é o primeiro episodio deste tipo desde a implantación da nova ordenación.

Con todo, Fuentes advirte de que a concentración de todo o tráfico de subida desde Virxe da Cerca pola Costa de San Domingos e Valle-Inclán incrementa notablemente a presenza de vehículos nunha zona especialmente sensible pola proximidade do centro escolar. Desde a asociación entenden que unha maior intensidade de tráfico tamén aumenta o risco de que se produzan novos accidentes.

A ANPA trasladou novamente esta preocupación ao concelleiro de Mobilidade, Xan Duro, e insiste en que a recuperación do dobre sentido nas Rodas contribuiría a mellorar a seguridade no entorno. Como alternativa, no caso de que o Concello manteña a actual configuración, as familias propoñen que polo menos se permita a circulación en ambos sentidos para o transporte urbano.

A preocupación medra tamén ante o novo mapa de liñas de autobús, que prevé unha importante presenza de transporte público neste tramo. Segundo sinalan desde a asociación, varias liñas pasarán pola zona cunha frecuencia elevada, o que engadirá máis circulación a un punto xa especialmente cargado nas horas de entrada e saída do alumnado.

La Salle conta con arredor de 1.400 estudantes e nas horas punta é habitual a acumulación de vehículos particulares e familias que acoden a deixar ou recoller os menores. A ANPA xa advertira meses atrás dos problemas de mobilidade e das situacións de risco que se producen neses momentos, especialmente pola combinación de retencións, présas ao volante e unha elevada presenza de peóns.