Boiro impulsa unha transformación social e cultural sen precedentes

• O alcalde destaca a creación de vivendas de emerxencia, novos centros asistenciais e a rehabilitación integral de espazos públicos e culturais no municipio

O alcalde de Boiro, José Ramón Romero, avanzou en Radio Líder Santiago unha batería de proxectos de grande impacto social e urbano que están a marcar o inicio do ano no municipio. Nunha entrevista ampla, Romero puxo en valor o “ADN social” do goberno local, detallando investimentos millonarios en vivenda social, atención a persoas con Alzheimer, inclusión, accesibilidade, cultura e servizos públicos, ao tempo que reclamou unha mellor financiación municipal por parte doutras administracións.

Romero subliñou que moitas das actuacións actuais “son proxectos que xa estaban pensados na primeira lexislatura e que agora se están materializando”, cunha clara aposta por concentrar recursos e servizos nunha zona estratéxica de Praia Xardín, que pasará a ser un auténtico polo educativo e social para o concello.

Un polo social en Praia Xardín con máis de tres millóns de euros de investimento

Un dos anuncios máis destacados foi a recuperación e reutilización das antigas vivendas do profesorado do CPI de Praia Xardín. O alcalde explicou que o Concello logrou que a Consellería de Educación cedese os inmobles para darlles “un segundo uso con finalidade social”.

Entre as actuacións xa en marcha, Romero salientou a posta en funcionamento dunha vivenda municipal de emerxencia: “Creamos unha vivenda de emerxencia para familias que sufran un incendio ou unha situación grave e non teñan onde aloxarse”.

Esta actuación supuxo un investimento de preto de 93.000 euros, financiados con fondos propios e apoio da Deputación da Coruña.

Ademais, o Concello asinou un convenio coa Asociación Galega de Alzheimer (AGADEA) para crear un novo centro de día con 26 prazas: “Vai ser un centro de día para persoas con Alzheimer e demencias, cunha inversión preto dun millón de euros”.

O proxecto inclúe tamén seis apartamentos para respiro familiar, unha iniciativa pioneira no municipio, coa previsión de que entre en funcionamento no mes de xullo.

A esta actuación súmase outro convenio por 50 anos coa asociación Ámbar, que permitirá crear un ecosistema de vivendas inclusivas: “É un servizo moi demandado polas familias, pensado para emerxencias, transicións ou para persoas que necesitan aprender a vivir soas”.

Máis recursos para emerxencia social, accesibilidade e atención no fogar

No ámbito social, Romero detallou a aprobación do POS Social da Deputación da Coruña, cun investimento de 127.000 euros destinados a múltiples accións. Entre elas, destacou axudas para a eliminación de barreiras arquitectónicas: “Son obras necesarias para facilitar a vida a persoas con dificultades e adaptar as vivendas”.

Tamén se reforza o banco municipal de axudas técnicas, con camas articuladas e grúas: “Estamos axudando a máis de 90 familias para que non teñan que afrontar gastos moi elevados”.

O plan inclúe tamén partidas para emerxencia social, conciliación familiar, reforzo de persoal técnico e a implantación de ferramentas tecnolóxicas: “Imos montar un sistema con intelixencia artificial e alertas SMS para conexión directa coa cidadanía en situacións de emerxencia”.

Reivindicación da financiación municipal e colaboración institucional

Durante a entrevista, o alcalde foi especialmente crítico coa carga económica que soportan os concellos en servizos non competenciais, como o Servizo de Axuda no Fogar (SAF): “En 2025 o SAF en Boiro supuxo 1.712.000 euros, dos cales o Concello asumiu máis de 900.000”.

Neste contexto, Romero puxo en valor o papel da Deputación da Coruña: “Non nos sobrecarga con máis servizos, senón que nos axuda a liberar cargas que estamos asumindo”.

Aposta cultural e renovación de espazos públicos

No eido cultural, o alcalde confirmou que están en marcha investimentos históricos, como a rehabilitación integral da Casa da Cultura de Boiro, cun orzamento de máis de 3,6 millóns de euros: “Era un edificio do ano 1988 que xa non cumpría coas necesidades culturais actuais”.

A obra obrigou ao peche temporal do edificio, aínda que a actividade cultural continúa noutros centros municipais. Ademais, avanzou novas actuacións en Cabo de Cruz e noutras parroquias para crear “unha rede de cultura espallada por todo o municipio”.

Romero tamén anunciou o inicio das obras para recuperar a Casa do Mar de Cabo de Cruz, unha demanda histórica da veciñanza.

Un inicio de ano “a todo gas” en Boiro

No tramo final da entrevista, o alcalde fixo balance do momento que vive o municipio: “Estamos arrancando o ano como canóns, con enerxía, ilusión e apretando o acelerador nesta recta final antes das eleccións”.

Romero confirmou que seguirá priorizando as políticas sociais, a cultura e os servizos públicos como eixos centrais da acción de goberno.